BMT bosh kotibi Marokash va POLISARIO frontini qo‘shinlarini olib ketishga va vaziyat keskinlashuviga yo‘l qo‘ymaslikka chaqirdi

BMT bosh kotibi Pan Gi Mun G‘arbiy Saxaradagi Marokash armiyasi va POLISARIO fronti kuchlari pozitsiyalari yaqinlashuvi kuzatilayotgan bufer hududidagi vaziyat keskinlashuvi yuzasidan xavotir bildirdi, deb yozadi “TASS”. Yozma bayonotida u tomonlarni qo‘shinlarni olib ketib, vaziyat yanada beqarorlashuvi oldini olishga chaqirdi.

Joriy yilning o‘rtalarida POLISARIO BMTga xat yozib, Marokash armiyasi bufer hududi chegarasini kesib o‘tganini ma’lum qildi, ammo tinchlikparvarlarini ushbu hududga joylashtirgan BMT harbiy operatsiya belgilarini topa olmadi.

Shunga qaramay, Pan Gi Mun o‘z bayonotida G‘arbiy Saxara janubi-sharqidagi bufer hududida yuzaga kelgan keskin vaziyatdan chuqur xavotirda ekanligini bildirdi.

G‘arbiy Saxaradagi vaziyat mart boshida keskinlashdi, o‘shanda Pan Gi Mun hudud maqomini okkupatsiyaga tenglashtirdi. Bunga javoban, Rabat G‘arbiy Saxarada referendum o‘tkazish bo‘yicha BMT missiyasining deyarli barcha noharbiy xodimlarini haydab yubordi va harbiy koordinatsiya markazini yopdi. Aprelda BMT Xavfsizlik kengashi missiyaning G‘arbiy Saxaradagi vakolatini yana bir yilga uzaytirdi.