Nepal g‘arbidagi Argxakxanchi tumanida jip avtomobilining jarlikka qulashi oqibatida 10 kishi halok bo‘ldi, olti kishi og‘ir jarohat oldi. Bu haqda “TASS” xabar bermoqda.
Huquq-tartibot idoralari ma’lumotlariga ko‘ra, halokatga Postapata qishlog‘i yaqinida toqqa ko‘tarilayotgan jipning orqa g‘ildiragi yorilishi va shundan so‘ng tormozning pand berishi sabab bo‘ldi. Boshqaruv yo‘qotilishi tufayli mashina 210 metr chuqurlikdagi jarlikka quladi.
Mahalliy aholi va yetib kelgan qutqaruvchilar qurbonlar hamda jabrlanganlarni olib chiqish bo‘yicha birgalikdagi operatsiyani amalga oshirdi. Operatsiya davomida jipda jami 16 kishi bo‘lgani aniqlandi. Ulardan 10 nafari hodisa joyida halok bo‘ldi, olti kishi og‘ir jarohatlar bilan kasalxonaga yetkazildi, shifokorlar ularning hayoti uchun kurashmoqda.
Izoh (0)