Hasanboy Do‘stmatov Olimpadada texnikasi eng kuchli bokschiga beriladigan Vel Barker Kubogi sohibiga aylangan ilk o‘zbekistonlik bo‘ldi

Boks bo‘yicha -49 kilogramm vazn toifasida Olimpiada chempioniga aylangan Hasanboy Do‘stmatov texnikasi eng kuchli sportchiga beriladigan Vel Barker Kubogi sohibiga aylandi, deb xabar bermoqda UzDaily.

Hasanboy Do‘stmatov Vel Barker Kubogini qo‘lga kiritgan birinchi o‘zbekistonlik bokschi bo‘ldi. Vel Barker Kubogi 1936-yildan buyon Olimpiadada texnikasi eng kuchli bokschiga beriladigan mukofot sanaladi.

Eslatib o‘tamiz, Hasanboy Do‘stmatov hal qiluvchi finalga qadar uch nafar raqibining har birini uchta raund natijasiga ko‘ra mag‘lub etishga muvaffaq bo‘lgandi. Bular: meksikalik Xoselito Velaskes, qozog‘istonlik Birjan Jakipov va amerikalik Niko Ernandes.

Qayd etish joiz, O‘zbekiston boks terma jamoasi 3 ta oltin, 2 ta kumush va 2 ta bronza medalini qo‘lga kiritib, mazkur sport yo‘nalishida Kuba, Qozog‘iston va Fransiya mamlakatlarini ortda qoldirib, 1-o‘rinni egalladi.