Iqtisodiy hamkorlik va taraqqiyot tashkiloti tahlilchilari atmosferaning ifloslanishi tufayli yaqin 45 yil ichida 200 million odam bevaqt vafot etadi deb hisoblamoqda. Bu haqda “Vedomosti” xabar bermoqda.
Ularning hisob-kitobiga qaraganda, 2060-yilgacha, shu jumladan, yuqoridagi sabab tufayli yiliga 6—9 million odam vafot etadi. Bu ko‘rsatkich 2010-yilda 3 millionni tashkil etgan.
Tashkilot fikricha, 2060-yilning oxiriga kelib jahon iqtisodiyoti ifloslangan ob-havoning xodimlar sog‘lig‘i va mehnat unumdorligiga ta’sir qilishi tufayli yiliga 3,75 milliard ish kunini yo‘qotadi.
Bunday ifloslanishning to‘g‘ridan-to‘g‘ri ta’siri jahon yalpi ichki mahsulotining 1 foizidan oshishi yoki yiliga 2,6 trillion dollarni tashkil etishi mumkin.
Shu bilan birga havoning ifloslanishi bilan bog‘liq kasalliklarning ortishi kutilmoqda. Jumladan, 6 yoshdan 12 yoshgacha bo‘lgan bolalarda bronxitga chalinish holatlari to‘rt barobar oshishi — yiliga 36 million, kattalarda esa uch barobar — yiliga 10 millionni tashkil etishi ma’lum qilinmoqda. Bolalar astmaga ko‘proq chalina boshlaydi.
Aholi zichligi va ifloslanish darajasi yuqori bo‘lgan mamlakatlarda, jumladan, Hindiston va Xitoyda vaziyat boshqa mamlakatlarga qaraganda yomonroq bo‘lishi kutilmoqda.
Izoh (0)