Qozog‘istonda Kaspiy dengizidagi birinchi harbiy pirs qurilishi yakunlanmoqda

Qozog‘istonda Oqtov xalqaro dengiz savdo porti hududidagi birinchi harbiy pirs (kemalar bog‘lab qo‘yiladigan maxsus joy) qurilishi o‘z nihoyasiga yetmoqda, deb yozadi “TASS” respublika mudofaa vazirligiga tayanib. Obyekt shu yilning oktabrida rasman topshirilishi kutilmoqda.

Prichal qurilishi fevralda boshlangan. Ta’kidlanishicha, bu “respublika harbiy-dengiz kuchlari tarixida harbiy maqsaddagi birinchi pirs bo‘ladi”.

Oqtov shahridagi portda Qozog‘iston harbiy-dengiz kuchlari kemalari uchun birinchi baza punktining qurilishi Qozog‘istonning Kaspiy dengizi sektorida ehtimoliy xavflarga o‘z vaqtida va samaradorlik bilan javob ko‘rsatish, kemalarni Kaspiy dengizining har qanday hududiga tezkorlik bilan chiqarish, moddiy-texnik ta’minotni yetkazib berish imkonini beradi.