Farg‘ona vodiysi nafaqat o‘zbek futbolining, balki chinakam futbol shinavandalarining ham vatanidir. “Daryo” internet-nashri Ucell savdo belgisi bilan hamkorlikda tashkil etgan “Yevro—2016” aksiyasi bu fikrni yana bir karra tasdiqladi.
10-iyundan 10-iyulga qadar Fransiya yashil maydonlarida bo‘lib o‘tgan futbol bo‘yicha Yevropa chempionati bilan bir vaqtda Telegram’dagi @daryobot’da “Yevro—2016” qo‘shma aksiyasi o‘tkazildi. Unda ishtirokchilar Fransiyada bo‘layotgan uchrashuvlarning natijalarini taxmin qilib topishi kerak edi. Taxminlari eng ko‘p to‘g‘ri chiqqan ishtirokchilar Ucell savdo belgisi tomonidan qimmatbaho sovg‘alar bilan taqdirlanishi ko‘zda tutilgan edi.
Aksiya yakunlariga ko‘ra, 1-o‘rinni farg‘onalik Shukrulloxon Karimov, 2-o‘rinni farg‘onalik Abror Otaboyev egalladi. 3-o‘rin egasini aniqlash maqsadida alohida qur’a tashlandi va, uning natijalariga ko‘ra, andijonlik Jasur Rahimov uchinchi sovrindorga aylandi.
5-avgust kuni Ucell’ning bosh ofisida aksiya g‘olib va sovrindorlarini taqdirlash marosimi bo‘lib o‘tdi. Bungacha futbolga ixtisoslashgan nafaqat O‘zbekiston, balki xorij saytlarida tashkil etilgan futbol bashorati tanlovlarida muntazam ishtirok etib, bir necha bor g‘olib va sovrindor bo‘lgan Jasur Rahimovga, 3-o‘rin egasi sifatida, Huawei Y360 smartfoni topshirildi. Asli kasbi shifokor bo‘lgan Jasur Rahimov futbolning sehrli olamiga Yevro—1992 bilan kirib kelgan bo‘lib, “Andijon” futbol klubining ashaddiy ishqibozlaridandir.
Abror Otaboyev O‘zbekistonning faol yoshlaridan. U “Kamolot” yoshlar ijtimoiy harakati Andijon viloyat kengashida bo‘lim boshlig‘i sifatida ishlaydi, shu bilan birga futbol bahslarini ham diqqat bilan kuzatib boradi. 2002-yilgi jahon chempionatidan beri hech bir yirik futbol musobaqasini e’tibordan chetda qoldirmagan Abror Otaboyev Yevro—2016 ning 12 uchrashuvi, xususan, final bahsi natijasini ham to‘g‘ri taxmin qildi. U, “Yevro—2016” aksiyasining 2-o‘rin sohibi sifatida, Android One General Mobile smartfoni bilan taqdirlandi.
25 yoshli Shukrulloxon Karimov “Daryo” va Ucell tomonidan o‘tkazilgan “Yevro—2016” qo‘shma aksiyasining g‘olibi o‘laroq Huawei P7 smartfoni egasiga aylandi. Shukrulloxon ayni vaqtda xususiy tadbirkorlik faoliyati bilan shug‘ullanayotgan bo‘lsa-da, bolaligidan futbolga oshno: o‘z vaqtida Farg‘onaning “Neftchi” futbol klubi o‘rinbosarlar tarkibida to‘p surishga ham ulgurgan bu yigit bundan 20 yil avvalgi Yevropa chempionati bahslaridan ham zavq olishga muvaffaq bo‘lgan.
“Daryo” internet-nashri va Ucell savdo belgisi “Yevro—2016” aksiyasida ishtirok etgan barcha futbol muxlislariga yana bir bor alohida minnatdorchilik bildiradi, g‘olib va sovrindorlarni aksiyadagi muvaffaqiyatli ishtirok bilan chin ko‘ngildan tabriklaydi.
“Daryo” bundan keyin ham qiziqarli aksiya va tanlovlar tashkil etishni rejalashtirmoqda. Bu boradagi yangiliklarni o‘tkazib yubormaslik uchun “Daryo”ni diqqat bilan kuzatib borishni tavsiya qilamiz.
Izoh (0)