Фарғона водийси нафақат ўзбек футболининг, балки чинакам футбол шинавандаларининг ҳам ватанидир. «Дарё» интернет-нашри Ucell савдо белгиси билан ҳамкорликда ташкил этган «Евро—2016» акцияси бу фикрни яна бир карра тасдиқлади.
10 июндан 10 июлга қадар Франция яшил майдонларида бўлиб ўтган футбол бўйича Европа чемпионати билан бир вақтда Telegram’даги @daryobot’да «Евро—2016» қўшма акцияси ўтказилди. Унда иштирокчилар Францияда бўлаётган учрашувларнинг натижаларини тахмин қилиб топиши керак эди. Тахминлари энг кўп тўғри чиққан иштирокчилар Ucell савдо белгиси томонидан қимматбаҳо совғалар билан тақдирланиши кўзда тутилган эди.
Акция якунларига кўра, 1-ўринни фарғоналик Шукруллохон Каримов, 2-ўринни фарғоналик Аброр Отабоев эгаллади. 3-ўрин эгасини аниқлаш мақсадида алоҳида қуръа ташланди ва, унинг натижаларига кўра, андижонлик Жасур Раҳимов учинчи совриндорга айланди.
5 август куни Ucell’нинг бош офисида акция ғолиб ва совриндорларини тақдирлаш маросими бўлиб ўтди. Бунгача футболга ихтисослашган нафақат Ўзбекистон, балки хориж сайтларида ташкил этилган футбол башорати танловларида мунтазам иштирок этиб, бир неча бор ғолиб ва совриндор бўлган Жасур Раҳимовга, 3-ўрин эгаси сифатида, Huawei Y360 смартфони топширилди. Асли касби шифокор бўлган Жасур Раҳимов футболнинг сеҳрли оламига Евро—1992 билан кириб келган бўлиб, «Андижон» футбол клубининг ашаддий ишқибозларидандир.
Аброр Отабоев Ўзбекистоннинг фаол ёшларидан. У «Камолот» ёшлар ижтимоий ҳаракати Андижон вилоят кенгашида бўлим бошлиғи сифатида ишлайди, шу билан бирга футбол баҳсларини ҳам диққат билан кузатиб боради. 2002 йилги жаҳон чемпионатидан бери ҳеч бир йирик футбол мусобақасини эътибордан четда қолдирмаган Аброр Отабоев Евро—2016 нинг 12 учрашуви, хусусан, финал баҳси натижасини ҳам тўғри тахмин қилди. У, «Евро—2016» акциясининг 2-ўрин соҳиби сифатида, Android One General Mobile смартфони билан тақдирланди.
25 ёшли Шукруллохон Каримов «Дарё» ва Ucell томонидан ўтказилган «Евро—2016» қўшма акциясининг ғолиби ўлароқ Huawei P7 смартфони эгасига айланди. Шукруллохон айни вақтда хусусий тадбиркорлик фаолияти билан шуғулланаётган бўлса-да, болалигидан футболга ошно: ўз вақтида Фарғонанинг «Нефтчи» футбол клуби ўринбосарлар таркибида тўп суришга ҳам улгурган бу йигит бундан 20 йил аввалги Европа чемпионати баҳсларидан ҳам завқ олишга муваффақ бўлган.
«Дарё» интернет-нашри ва Ucell савдо белгиси «Евро—2016» акциясида иштирок этган барча футбол мухлисларига яна бир бор алоҳида миннатдорчилик билдиради, ғолиб ва совриндорларни акциядаги муваффақиятли иштирок билан чин кўнгилдан табриклайди.
«Дарё» бундан кейин ҳам қизиқарли акция ва танловлар ташкил этишни режалаштирмоқда. Бу борадаги янгиликларни ўтказиб юбормаслик учун «Дарё»ни диққат билан кузатиб боришни тавсия қиламиз.
Изоҳ (0)