Jahonning bugungi kundagi eng kuchli futbolchisi kim degan savol bir qator tortishuvlarga sabab bo‘ladi va unda asosan ikkita nom ko‘rsatiladi: Messi va Ronaldu.
“Sports.ru” nashri Messi hamda Ronaldu bilan birga to‘p surgan 9 nafar futbolchi nomini keltirib o‘tdi.
Deku
Deku va Krishtianu Ronaldu 2004-yili birgalikda Yevropa Chempionatida zafar quchishi mumkin edi. Biroq ozgina yetmay qoldi. Bu futbolchilar 2003—2010-yillar davomida Portugaliya safida birga harakat qildi.
2004—2008-yillar davomida Deku “Barselona” a’zosi hisoblangan. O‘sha vaqtlarda Messi boshlang‘ich tarkibdagi o‘rnini mustahkamlab borardi. Messi va Deku birgalikda ikki bor La Ligada zafar quchdi va bir marta Chempionlar Ligasida muvaffaqiyat qozondi.
Gabriel Xaynse
Xaynse va Ronalduga “Real” safida birga to‘p surish nasib qilmadi. Argentinalik futbolchining Madriddan ketish vaqti hamda Krishtining ko‘chib kelish vaqti bir paytga to‘g‘ri kelib qoldi. “Manchester Yunayted” esa ularni birlashtirgandi. 2004—2007-yillar oralig‘ida ular APL chempionligini nishonlashdi.
Messi va Xaynse juftligi Argentina milliy terma jamoasi bilan hech narsa yuta olgani yo‘q. Qiziq tomoni, har ikki futbolchiga Olimpiada o‘yinlari g‘olibligi nasib qildi, biroq 4 yillik farq bilan. Xaynse 2004-yilgi Afina Olimpiadasida, Messi esa 2008-yilgi Pekin Olimpiadasida oltin medalga ega chiqqan. 2005—2010-yillar davomida ular Argentina libosida bir jamoa bo‘la olishdi.
Xenrik Larsson
Larssonning gullagan davri buyuk “Barselona”dagi yillariga emas, “Seltik” sharafini himoya qilgan vaqtlariga to‘g‘ri keladi. Biroq bu futbolchining Messi hayotidagi xizmati katta. Lionel boshlang‘ich tarkibni o‘ziniki qilib olishida Larsson ham katta mehnat qildi. 2004—2006-yilgi mavsumda ular La Ligada ikki bor zafar quchishdi va bir marta Chempionlar Ligasi kubogini ham ko‘rishdi.
Larsson “Yunayted” libosini ancha kech kiydi. 2007-yil u 36 yoshni qarshi olgandi va mana shu paytda bir necha o‘yin uchun Manchesterga tashrif buyurdi. 13 ta bellashuvda 3 ta gol urgan Larsson Krishtianu Ronalduning qanday qilib megayulduzga aylanib borishini o‘z ko‘zlari bilan kuzatdi.
Jerar Pike
Pireney yarim orollarining ikki vakili “Manchester Yunayted”da uchrashishdi. Biroq ulardan faqatgina bittasi bu jamoada katta iz qoldirdi, Pikening ishlari esa u qadar o‘xshamadi. Fakt shuki, ular 2004—2008-yilgi mavsumda bitta jamoa futbolchilari edi.
2008-yildan buyon Pike Messi bilan do‘st tutindi va o‘tgan vaqt davomida ular yutish mumkin bo‘lgan har qanday turnirni yutib chiqishdi.
Karlos Teves
2005—2015-yillar davomida Messi va Teves Argentina milliy terma jamoasida uchrashib turishdi. Ularni argentinalik muxlislar yaxshi xotiralar bilan yodga oladi.
Teves va Ronaldu juftligi nisbatan foydaliroq bo‘lgan. Har holda ular 2007—2009-yilgi mavsumlar davomida ikki bor Angliya chempionligi va bir marta Chempionlar Ligasi Kubogini boshlari uzra baland ko‘tarishdi.
Fernando Gago
Gago va Messi deyarli tengdosh futbolchilar. Ular 2005-yil Argentina yoshlar terma jamoasi bilan Jahon Chempionatida zafar quchdi, Pekin Olimpiadasining qahramoniga aylandi. 2007-yildan boshlab esa Argentina milliy terma jamoasida uchrashib turadigan bo‘lishdi.
Gagoning “Real”dagi eng yaxshi yillari Krishtianu Ronalduning tashrifiga qadar bo‘ldi. Ronaldu kelganidan keyin esa u markaziy yarim himoyachilar o‘rtasidagi raqobatda yutib chiqa olmadi. Shunga qaramay ular 2009—2011-yillar davomida bitta klub futbolchilari bo‘lib, do‘st tutinishdi.
Esekiel Garay
Garay va Messi yoshlikdan birga. Xuddi o‘sha 2005-yilgi yoshlar mundialidan tortib, 2008-yilgi Olimpiadaga qadar birga yutib olishdi. Keyin esa milliy terma jamoa ularni tutashtiradigan makonga aylandi.
Garayning “Real”dagi hayoti Gagonikiga juda o‘xshab ketadi. Fakt shuki, Ronaldu va Garay 2009—2011-yilgi mavsumda bir jamoa futbolchilari edi.
Anxel Di Mariya
Messi va Di Mariya tandemi Argentina terma jamoasidagi eng yaxshi tandemlardan edi. Olimpiada o‘yinlarida Messining pasidan keyin Di Mariya Nigeriya darvozasini ishg‘ol qildi. Bu gol Argentinaga Olimpiada o‘yinlari chempionligini taqdim etdi. Kopa Amerikada ham ular Argentinaning finallarga qadar yetib borishida muhim rol o‘ynashdi. Biroq 2014-yilgi JCh finalini Di Mariya jarohat sabab qo‘yib yubordi.
Ronaldu va Di Mariya tandemi ham ajoyib chiqdi. Ular 4 yil davomida ko‘plab sovrinlar yutib olishdi: La Liga, Chempionlar Ligasi. 2010—2014-yilgi mavsumlarda ular birga bo‘lishdi. Qiziq tomoni, Ronaldu “Yunayted”dan kelgandi, Di Mariya esa “Yunayted”ga ketib, Krishti bilan xayrlashdi.
Gonsalu Iguain
2009—2016-yilgi mavsumda Messi va Gonsalo Argentina terma jamoasida birga bo‘lishdi. Gonsalo final bellashuvlarida aniqroq harakat qilganida, biz bu futbolchilarning quvonch to‘la rasmlarini ham ko‘rishimiz mumkin edi.
2009—2013-yillar. Gonsalo va Krishtianu “Real”da uchrashishdi. Esdan chiqmaydigan yillar.
Bonus: Andre Gomesh
2014-yildan boshlab Portugaliya terma jamoasi a’zosi hisoblangan Andre Gomesh tez orada Yevropa Chempionligini qo‘lga kiritdi. Bu unga “Barselona” eshiklarini ochib beradi. Endi uning yurishi Lionel Messi bilan davom etadi.
Izoh (0)