Жаҳоннинг бугунги кундаги энг кучли футболчиси ким деган савол бир қатор тортишувларга сабаб бўлади ва унда асосан иккита ном кўрсатилади: Месси ва Роналду.
«Sports.ru» нашри Месси ҳамда Роналду билан бирга тўп сурган 9 нафар футболчи номини келтириб ўтди.
Деку
Деку ва Криштиану Роналду 2004 йили биргаликда Европа Чемпионатида зафар қучиши мумкин эди. Бироқ озгина етмай қолди. Бу футболчилар 2003—2010 йиллар давомида Португалия сафида бирга ҳаракат қилди.
2004—2008 йиллар давомида Деку «Барселона» аъзоси ҳисобланган. Ўша вақтларда Месси бошланғич таркибдаги ўрнини мустаҳкамлаб борарди. Месси ва Деку биргаликда икки бор Ла Лигада зафар қучди ва бир марта Чемпионлар Лигасида муваффақият қозонди.
Габриэл Хайнце
Хайнце ва Роналдуга «Реал» сафида бирга тўп суриш насиб қилмади. Аргентиналик футболчининг Мадриддан кетиш вақти ҳамда Криштининг кўчиб келиш вақти бир пайтга тўғри келиб қолди. «Манчестер Юнайтед» эса уларни бирлаштирганди. 2004—2007 йиллар оралиғида улар АПЛ чемпионлигини нишонлашди.
Месси ва Хайнце жуфтлиги Аргентина миллий терма жамоаси билан ҳеч нарса юта олгани йўқ. Қизиқ томони, ҳар икки футболчига Олимпиада ўйинлари ғолиблиги насиб қилди, бироқ 4 йиллик фарқ билан. Хайнце 2004 йилги Афина Олимпиадасида, Месси эса 2008 йилги Пекин Олимпиадасида олтин медалга эга чиққан. 2005—2010 йиллар давомида улар Аргентина либосида бир жамоа бўла олишди.
Хенрик Ларссон
Ларссоннинг гуллаган даври буюк «Барселона»даги йилларига эмас, «Селтик» шарафини ҳимоя қилган вақтларига тўғри келади. Бироқ бу футболчининг Месси ҳаётидаги хизмати катта. Лионель бошланғич таркибни ўзиники қилиб олишида Ларссон ҳам катта меҳнат қилди. 2004—2006 йилги мавсумда улар Ла Лигада икки бор зафар қучишди ва бир марта Чемпионлар Лигаси кубогини ҳам кўришди.
Ларссон «Юнайтед» либосини анча кеч кийди. 2007 йил у 36 ёшни қарши олганди ва мана шу пайтда бир неча ўйин учун Манчестерга ташриф буюрди. 13 та беллашувда 3 та гол урган Ларссон Криштиану Роналдунинг қандай қилиб мегаюлдузга айланиб боришини ўз кўзлари билан кузатди.
Жерар Пике
Пиреней ярим оролларининг икки вакили «Манчестер Юнайтед»да учрашишди. Бироқ улардан фақатгина биттаси бу жамоада катта из қолдирди, Пикенинг ишлари эса у қадар ўхшамади. Факт шуки, улар 2004—2008 йилги мавсумда битта жамоа футболчилари эди.
2008 йилдан буён Пике Месси билан дўст тутинди ва ўтган вақт давомида улар ютиш мумкин бўлган ҳар қандай турнирни ютиб чиқишди.
Карлос Тевес
2005—2015 йиллар давомида Месси ва Тевес Аргентина миллий терма жамоасида учрашиб туришди. Уларни аргентиналик мухлислар яхши хотиралар билан ёдга олади.
Тевес ва Роналду жуфтлиги нисбатан фойдалироқ бўлган. Ҳар ҳолда улар 2007—2009 йилги мавсумлар давомида икки бор Англия чемпионлиги ва бир марта Чемпионлар Лигаси Кубогини бошлари узра баланд кўтаришди.
Фернандо Гаго
Гаго ва Месси деярли тенгдош футболчилар. Улар 2005 йил Аргентина ёшлар терма жамоаси билан Жаҳон Чемпионатида зафар қучди, Пекин Олимпиадасининг қаҳрамонига айланди. 2007 йилдан бошлаб эса Аргентина миллий терма жамоасида учрашиб турадиган бўлишди.
Гагонинг «Реал»даги энг яхши йиллари Криштиану Роналдунинг ташрифига қадар бўлди. Роналду келганидан кейин эса у марказий ярим ҳимоячилар ўртасидаги рақобатда ютиб чиқа олмади. Шунга қарамай улар 2009—2011 йиллар давомида битта клуб футболчилари бўлиб, дўст тутинишди.
Эсекиэл Гарай
Гарай ва Месси ёшликдан бирга. Худди ўша 2005 йилги ёшлар мундиалидан тортиб, 2008 йилги Олимпиадага қадар бирга ютиб олишди. Кейин эса миллий терма жамоа уларни туташтирадиган маконга айланди.
Гарайнинг «Реал»даги ҳаёти Гагоникига жуда ўхшаб кетади. Факт шуки, Роналду ва Гарай 2009—2011 йилги мавсумда бир жамоа футболчилари эди.
Анхел Ди Мария
Месси ва Ди Мария тандеми Аргентина терма жамоасидаги энг яхши тандемлардан эди. Олимпиада ўйинларида Мессининг пасидан кейин Ди Мария Нигерия дарвозасини ишғол қилди. Бу гол Аргентинага Олимпиада ўйинлари чемпионлигини тақдим этди. Копа Америкада ҳам улар Аргентинанинг финалларга қадар етиб боришида муҳим рол ўйнашди. Бироқ 2014 йилги ЖЧ финалини Ди Мария жароҳат сабаб қўйиб юборди.
Роналду ва Ди Мария тандеми ҳам ажойиб чиқди. Улар 4 йил давомида кўплаб совринлар ютиб олишди: Ла Лига, Чемпионлар Лигаси. 2010—2014 йилги мавсумларда улар бирга бўлишди. Қизиқ томони, Роналду «Юнайтед»дан келганди, Ди Мария эса «Юнайтед»га кетиб, Кришти билан хайрлашди.
Гонсалу Игуаин
2009—2016 йилги мавсумда Месси ва Гонсало Аргентина терма жамоасида бирга бўлишди. Гонсало финал беллашувларида аниқроқ ҳаракат қилганида, биз бу футболчиларнинг қувонч тўла расмларини ҳам кўришимиз мумкин эди.
2009—2013 йиллар. Гонсало ва Криштиану «Реал»да учрашишди. Эсдан чиқмайдиган йиллар.
Бонус: Андре Гомеш
2014 йилдан бошлаб Португалия терма жамоаси аъзоси ҳисобланган Андре Гомеш тез орада Европа Чемпионлигини қўлга киритди. Бу унга «Барселона» эшикларини очиб беради. Энди унинг юриши Лионель Месси билан давом этади.
Изоҳ (0)