UzReport telekanali 9-avgust kuni bo‘lib o‘tadigan “Real” va “Sevilya” klublari o‘rtasidagi UEFA Superkubogi finalini to‘g‘ridan-to‘g‘ri translyatsiya qiladi, deb xabar berdi UzReport sayti.
Norvegiyaning Tronxeym shahrida bo‘lib o‘tadigan bellashuv Toshkent vaqti bilan 23:45 da start oladi. UzReport esa translyatsiyani bir soat avvalroq boshlab, o‘yinoldi barcha jarayonlarini namoyish qilishni rejalashtirgan.
Yevropa Ligasi finalida “Liverpul”ni mag‘lub etgan “Sevilya” o‘z tarixida beshinchi bor UEFA Superkubogida ishtirok etish huquqini qo‘lga kiritdi. Madridning “Real” klubi ham Yevropa Superkubogida beshinchi bor ishtirok etadi. Farqi — “Real” har safar nufuzi jihatdan Yevropadagi birinchi raqamli klublar musobaqasi — Yevropa Chempionlar Ligasida zafar quchib, Superkubokda o‘ynash huquqini qo‘lga kiritgan.
Yevropa Superkubogi uchun o‘yinlar o‘tkaziladigan Fransiyaning Monako shahridan keyin UEFA Praga (2013), Kardiff (2014), Tbilisi (2015) shaharlariga ham imkoniiyat taqdim etdi. Ularning barchasida Yevropa Chempionlar Ligasida zafar quchgan klublarning qo‘li baland keldi. Norvegiyadagi o‘yinda ham bu hol takrorlansa, Yevropa Ligasi g‘olibining ketma-ket taslim bo‘lishi borasida yangi rekord o‘rnatiladi.
Izoh (0)