Joriy yilning 10-sentabr — 1-oktabr kunlari Kolumbiyada futzal bo‘yicha jahon chempionati bahslari bo‘lib o‘tadi. Musobaqada O‘zbekiston milliy terma jamoasi ham ishtirok etadi va bu o‘zbek futzalchilarining mundiallardagi ilk ishtiroki bo‘ladi.
Musobaqani batafsil yoritib borishni rejalashtirayotgan “Daryo” internet-nashri bugundan e’tiboran jahon chempionati ishtirokchilarini tanishtirib boradi. Dastlab — mezbonlar haqida.
Qanday qilib musobaqa mezboniga aylangan?
Musobaqa mezbonligi uchun dastlab, Kolumbiyadan tashqari, yana besh mamlakat — Fransiya, Eron, Puerto-Riko, Ispaniya va Chexiya da’vogarlik qilgan edi. Oxir-oqibat, kurash faqat ikki mamlakat — Kolumbiya va Chexiya o‘rtasida davom etib, 2013-yilning 28-may kuni FIFA Ijroiya qo‘mitasi musobaqa Janubiy Amerikada o‘tishini e’lon qildi.Qur’a natijalariga ko‘ra, Kolumbiya JCh—2016 guruh bosqichida 2016-yilgi Yevropa chempionatining chorak finalchisi Portugaliya, 2016-yilgi Shimoliy Amerika vitse-chempioni Panama va 2016-yilgi Osiyo vitse-chempioni O‘zbekiston terma jamoalariga qarshi bahs olib boradi. Kolumbiya — O‘zbekiston uchrashuvi 13-sentabr kuniga belgilangan.
Kuchli tomonlari
Osmar Fonnegra qo‘l ostidagi Kolumbiya terma jamoasi xalqaro futzalda o‘zini mutlaqo yangi kuch sifatida o‘zini namoyon qilib ulgurgan. “Qahva yetishtiruvchilar” buni jahon chempionati yo‘llanmalari o‘ynalgan 2015-yilgi Kopa Amerikada, JCh—2016 mezboni bo‘lsa-da, 4-o‘rinni egallagani, 2005-yildan beri har yili Braziliyada tashkil etiladigan futzal Gran-prisida 3-o‘rinni band etgani bilan yana bir karra isbotlay oldi.
“Real Bukaramanga” sharafini himoya qiluvchi Anjello Karo va “Rionegro” o‘yinchisi Jonatan Toro kabi to‘rt yil avval Tailandda o‘tgan JCh—2012 da rostmana porlagan faxriy futbolchilar hozir ham terma jamoaning haqiqiy zarbdor kuchlari hisoblanadi. Bundan tashqari, Yulian Dias va Luis Poveda kabi yangi nomlar bo‘lajak jahon chempionatida, xususan, O‘zbekiston milliy terma jamoasi uchun ham jiddiy boshog‘riq bo‘lishi tayin.
Avval ham futzal bo‘yicha jahon chempionatlarida qatnashganmi?
Kolumbiya bungacha faqat bir marta — 2012-yili Tailand zallarida o‘tgan jahon chempionatida ishtirok etgan va debyutdayoq hammani lol qoldirishga muvaffaq bo‘lgan. O‘z guruhida 2-o‘rinni egallagan kolumbiyaliklar nimchorak finalda Osiyo grandi Eronni, chorak finalda esa Yevropa vakili Ukrainani mag‘lub etib, faqat yarim finalda braziliyaliklarga mag‘lub bo‘lgan.
3-o‘rin uchun o‘yinda Italiyaga yirik hisobda imkoniyatni boy bergan bo‘lsa-da, Kolumbiya 2012-yilgi jahon chempionatining haqiqiy sensatsiyasiga aylangan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)