Rossiyalik istalgan sportchining 2016-yilgi Olimpiada o‘yinlariga qo‘yilishi masalasi individual tartibda ko‘rib chiqilishi zarur. Shu bilan birga, hatto bu masala ijobiy hal etilgan taqdirda ham sportchi faqat neytral bayroq ostida qatnashishi mumkin. Bu haqda Richard Maklarenning mustaqil komissiyasi hisoboti yakunlari bo‘yicha e’lon qilingan Butunjahon aksildoping agentligi (WADA) relizida ma’lum qilindi, deya xabar beradi “TASS”.
18-iyul, dushanba kuni komissiya 2014-yili Sochida bo‘lib o‘tgan Olimpiada o‘yinlarida doping bilan bog‘liq firibgarliklarga oid tekshiruv yakunlarini taqdim etdi. Hisobotga ko‘ra, Rossiya sport vazirligi, Rossiya terma jamoalari sport tayyorgarligi markazi va Federal xavfsizlik xizmati (FXX) mahalliy sportning doping dasturini qo‘llab-quvvatlagan.
“WADA Xalqaro olimpiya va xalqaro paralimpiya qo‘mitalariga Riodagi Olimpiada va Paralimpiadaga rossiyalik sportchilarning barchasini qo‘ymaslikni tavsiya etadi. Rossiyalik atletlarning har bir individual talabnomasi qo‘mitalar tomonidan o‘ta sinchiklab tekshirilishi va faqat neytral bayroq ostida ishtirok etish sharti bilan ko‘rib chiqilishi zarur”, — deyiladi agentlik relizida.
Izoh (0)