Argentinalik fotomodel Gvatemala qamoqxonasidagi qo‘zg‘olon chog‘ida halok bo‘ldi

Argentinalik fotomodel Xoanna Birryel Gvatemaladagi qattiq rejimli “Pavon” qamoqxonasida qo‘zg‘olon qurbonlaridan biriga aylandi, deb yozadi “TASS”.

24 yoshli qiz Gvatemala Qurolli kuchlari sobiq kapitani Biron Lima bilan uchrashuv vaqtida o‘ldirilgan, u 1998-yilda yepiskop Xuan Xerardini o‘ldirgani uchun qamalgan edi.

Versiyalardan biriga ko‘ra, atrof-muhit muhofazasi bo‘yicha loyihalar bilan ham shug‘ullangan Birryel mahbus bilan uning kompaniyalaridan birining faoliyatiga aloqador masalalarni muhokama qilmoqchi bo‘lgan.

18-iyul, dushanba kuni yuz bergan qo‘zg‘olonda jami 13 kishi halok bo‘ldi, 18 kishi jarohatlandi. Dastlabki ma’lumotlarga ko‘ra, mahbuslarning ikki guruhi o‘rtasida turmadagi ta’sir sohalarini taqsimlash borasida nizo kelib chiqqan.