Société des Produits Nestlé S.A. kompaniyasining Family Group’ga qarshi reklama faoliyati, Family water suvlarini ishlab chiqarish va sotishda Nestle savdo belgisi grafik elementlaridan foydalangani to‘g‘risidagi da’vosi Toshkent xo‘jalik sudi tomonidan qanoatlantirildi. “Gazeta.uz” xabariga ko‘ra, bunda “Ijtimoiy fikr” jamoatchilik fikrini o‘rganish markazi ma’lumotlaridan ham foydalanilgan.
Xabar berishlaricha, Nestle Pure Life mineral suvlariga taalluqli bo‘lgan qo‘llarini yuqoriga ko‘targan odamlarning uslublashtirilgan siymosi (bir rangda ishlangan kontur surat), shuningdek, markazdan taraluvchi ko‘k-moviy nurlar manzarasidagi aylana da’voga sabab bo‘lgan.
Nestle’ning da’vosi “Ijtimoiy fikr” markazi tomonidan Toshkent, Samarqand va Andijonda o‘tkazilgan so‘rovnomalarda ham o‘z tasdig‘ini topdi. So‘rovnomalarda 18 dan 45 yoshgacha bo‘lgan 300 kishining fikri o‘rganilib, ularga brend nomlari yashiringan Family va Nestle Pure Life suvlari idishlari ko‘rsatildi.
58,5 foiz respondent savdo belgilari bitta kompaniyaga tegishli, deya ma’lum qilgan bo‘lsa, ularning 94 foizi bunda Nestle brendini yodga oldi. So‘rovnomada qatnashgan 53,2 foiz kishi Family — Nestle kompaniyasi tomonidan ishlab chiqariladigan suv, degan fikrni bildirgan.
“Respondentlarning bunday xulosaga kelishiga o‘xshash yorliqlarda oila va insonlar shakllarining tasvirlangani sabab bo‘lgan, degan xulosani chiqaradi”, — deyiladi xabarda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)