Toshkentdagi Gagarin ko‘chasini ta’mirlash ishlari boshlandi

Toshkentning Chilonzor tumanidagi eski manzillardan biri — sayyoramizning birinchi kosmonavti yodgorligi poyidan boshlanuvchi Gagarin ko‘chasini ta’mirlash ishlari boshlandi. Bu haqda “Gazeta.uz” xabar berdi.

So‘lim xiyobon va ko‘plab o‘rindiqlarga ega mazkur ko‘cha shu atrofda yashovchi fuqarolarning sevimli hordiq maskaniga aylanib ulgurgan. Chilonzor hokimligi vakilining ma’lum qilishicha, ko‘chani ta’mirlash ishlari iyul oxiriga qadar tugallanishi lozim. Hozirda bu yerda beton plitalar yig‘ib olinmoqda. Ko‘cha bo‘ylab joylashgan uylarning tashqi tomonini ta’mirlash, ular qiyofasiga yarashmaydigan obyektlarni demontaj qilish ishlari boshlandi.

Xiyobon chetlariga maysa yotqizilishi ko‘zda tutilgan. Yangi ko‘cha fonuslari o‘rnatilmoqda, o‘rindiqlar ham yangilanadi. Avtobus bekati esa oyna to‘siqlar bilan o‘ralib, yopiq holatga keltiriladi. Gagarin maydonining o‘zi ham yangilanmoqda: kosmonavt yodgorligi atrofidagi monument ko‘rinishini berkitib turgan do‘kon va oshxonalar buzilmoqda.