Société des Produits Nestlé S.A. компаниясининг Family Group’га қарши реклама фаолияти, Family water сувларини ишлаб чиқариш ва сотишда Nestle савдо белгиси график элементларидан фойдалангани тўғрисидаги даъвоси Тошкент хўжалик суди томонидан қаноатлантирилди. «Газета.uz» хабарига кўра, бунда «Ижтимоий фикр» жамоатчилик фикрини ўрганиш маркази маълумотларидан ҳам фойдаланилган.
Хабар беришларича, Nestle Pure Life минерал сувларига тааллуқли бўлган қўлларини юқорига кўтарган одамларнинг услублаштирилган сиймоси (бир рангда ишланган контур сурат), шунингдек, марказдан таралувчи кўк-мовий нурлар манзарасидаги айлана даъвога сабаб бўлган.
Nestle’нинг даъвоси «Ижтимоий фикр» маркази томонидан Тошкент, Самарқанд ва Андижонда ўтказилган сўровномаларда ҳам ўз тасдиғини топди. Сўровномаларда 18 дан 45 ёшгача бўлган 300 кишининг фикри ўрганилиб, уларга бренд номлари яширинган Family ва Nestle Pure Life сувлари идишлари кўрсатилди.
58,5 фоиз респондент савдо белгилари битта компанияга тегишли, дея маълум қилган бўлса, уларнинг 94 фоизи бунда Nestle брендини ёдга олди. Сўровномада қатнашган 53,2 фоиз киши Family — Nestle компанияси томонидан ишлаб чиқариладиган сув, деган фикрни билдирган.
«Респондентларнинг бундай хулосага келишига ўхшаш ёрлиқларда оила ва инсонлар шаклларининг тасвирлангани сабаб бўлган, деган хулосани чиқаради», — дейилади хабарда.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)