Nega millionerlar har kuni bir xil libos kiyib yuradi?

Moda sanoatining jadal sur’atlarda rivojlanishiga qaramay, “kapsulali garderob” nomli trend borgan sayin shuhrat qozonmoqda. Bunda boy va omadli insonlar 10–15 asosiy ust-boshdan iborat kiyim javonini yuksak modalar jamlanmasidan afzal ko‘radi.

AdMe buning sabablarini aniqlashga harakat qilib ko‘rdi.

1. Kamroq qaror qabul qilish

Qancha ko‘p qaror qabul qilsangiz, ularning sifati ham shuncha past bo‘ladi. Facebook asoschisi Mark Sukerberg mana shu fikrda sobit. Har kuni ishda muhim qarorlar qabul qiladigan odamlar uchun eng minimal muammo — “nima kiyaman?” degan savoldan qutulish ko‘proq fikr va vaqtni asosiy masalaga qaratish imkonini beradi.

2. Kamroq vaqt sarflash

Libos tanlashdan voz kechmas ekanmiz, bunga qancha ko‘p vaqt ketishini tasavvur ham qila olmaymiz. 2011-yili Moskvada “333” nomli tajriba o‘tkazilgan edi: ishtirokchilardan 3 oy mobaynida 33 ta kiyim-bosh predmetidan foydalanish talab qilinardi. Tajribada qatnashganlar juda ko‘p vaqt tejay boshlaganini, ertalab uydan chiqishga hozirlik ko‘rish ancha osonlashganini tan oldi.

3. Kamroq stress

Nyu-Yorkda ishlovchi art-direktor Matilda Kalning ta’kidlashicha, kapsulali garderob tufayli inson kun davomida kiyim-bosh haqida kam o‘ylaydi. Boshqa vaziyatlarda esa savollar ko‘payadi: kiyimim ortiq darajada bashang emasmi? Juda rasmiy kiyinmadimmi? Kiyim-boshim ortiq darajada ochiq-sochiq emasmi?

4. Kamroq kuch sarflash

Bu fikr mashhur rejissor Kristofer Nolanga tegishli. Uning aytishicha, nafaqat libos tanlash, balki ularni parvarishlash, yuvish, yangilash, kiyimlarni tartibga keltirish nihoyatda ko‘p kuch va vaqt olib qo‘yadi. Omadli insonlar esa kuchi va vaqtini foydaliroq ishlarga sarflaydi.

5. Ozgina-yu, sozgina

Garderobning kattaligi hali undagi kiyimlar sifatli degani emas. Ko‘plar shunchaki moda ketidan ergashib libos xarid qiladi, ularning barini kiyishga ham ulgurmaydi. Ortiqcha, yarashmaydigan kiyimlardan xalos bo‘lish son va sifat mutanosibligini ta’minlaydi.

6. Kult darajasiga yetish

Elis Gregori, yozuvchi, Nyu-York:

“Har kuni bitta narsa kiyish sizni kult darajasiga olib chiqadi. Bu o‘zingizni mashhur his qilishning arzon usulidir. Bir xil libos ulg‘ayganingizni, barqarorligingizni, doimiy qadriyatlarga egalingizni ko‘rsatadi. Shu bois bolalar kitoblari qahramonlari doimo bir xil libosda yuradi va taqlid uchun o‘rnakka aylanadi”.

7. Kamroq xarajat

Yuqorida aytilganidek, javonlarimizda biz hech qachon kiymagan liboslar ham bor. Bu nafaqat ortiqcha joy, balki ortiqcha xarajat ham demakdir. Shunday ekan, kapsulali garderob pul tejashga yordam beradi.