Нега миллионерлар ҳар куни бир хил либос кийиб юради?

Мода саноатининг жадал суръатларда ривожланишига қарамай, «капсулали гардероб» номли тренд борган сайин шуҳрат қозонмоқда. Бунда бой ва омадли инсонлар 10–15 асосий уст-бошдан иборат кийим жавонини юксак модалар жамланмасидан афзал кўради.

AdMe бунинг сабабларини аниқлашга ҳаракат қилиб кўрди.

1. Камроқ қарор қабул қилиш

Қанча кўп қарор қабул қилсангиз, уларнинг сифати ҳам шунча паст бўлади. Facebook асосчиси Марк Цукерберг мана шу фикрда собит. Ҳар куни ишда муҳим қарорлар қабул қиладиган одамлар учун энг минимал муаммо — «нима кияман?» деган саволдан қутулиш кўпроқ фикр ва вақтни асосий масалага қаратиш имконини беради.

2. Камроқ вақт сарфлаш

Либос танлашдан воз кечмас эканмиз, бунга қанча кўп вақт кетишини тасаввур ҳам қила олмаймиз. 2011 йили Москвада «333» номли тажриба ўтказилган эди: иштирокчилардан 3 ой мобайнида 33 та кийим-бош предметидан фойдаланиш талаб қилинарди. Тажрибада қатнашганлар жуда кўп вақт тежай бошлаганини, эрталаб уйдан чиқишга ҳозирлик кўриш анча осонлашганини тан олди.

3. Камроқ стресс

Нью-Йоркда ишловчи арт-директор Матильда Калнинг таъкидлашича, капсулали гардероб туфайли инсон кун давомида кийим-бош ҳақида кам ўйлайди. Бошқа вазиятларда эса саволлар кўпаяди: кийимим ортиқ даражада башанг эмасми? Жуда расмий кийинмадимми? Кийим-бошим ортиқ даражада очиқ-сочиқ эмасми?

4. Камроқ куч сарфлаш

Бу фикр машҳур режиссёр Кристофер Ноланга тегишли. Унинг айтишича, нафақат либос танлаш, балки уларни парваришлаш, ювиш, янгилаш, кийимларни тартибга келтириш ниҳоятда кўп куч ва вақт олиб қўяди. Омадли инсонлар эса кучи ва вақтини фойдалироқ ишларга сарфлайди.

5. Озгина-ю, созгина

Гардеробнинг катталиги ҳали ундаги кийимлар сифатли дегани эмас. Кўплар шунчаки мода кетидан эргашиб либос харид қилади, уларнинг барини кийишга ҳам улгурмайди. Ортиқча, ярашмайдиган кийимлардан халос бўлиш сон ва сифат мутаносиблигини таъминлайди.

6. Культ даражасига етиш

Элис Грегори, ёзувчи, Нью-Йорк:

«Ҳар куни битта нарса кийиш сизни культ даражасига олиб чиқади. Бу ўзингизни машҳур ҳис қилишнинг арзон усулидир. Бир хил либос улғайганингизни, барқарорлигингизни, доимий қадриятларга эгалингизни кўрсатади. Шу боис болалар китоблари қаҳрамонлари доимо бир хил либосда юради ва тақлид учун ўрнакка айланади».

7. Камроқ харажат

Юқорида айтилганидек, жавонларимизда биз ҳеч қачон киймаган либослар ҳам бор. Бу нафақат ортиқча жой, балки ортиқча харажат ҳам демакдир. Шундай экан, капсулали гардероб пул тежашга ёрдам беради.