NATO batalyonlari Polsha va Boltiqbo‘yiga 2017-yilda joylashtirila boshlaydi
NATO Polsha va Boltiq mamlakatlariga batalyonlarni joylashtirishga 2017-yilda kirishadi. Bu haqda NATO bosh kotibi Yens Stoltenberg ma’lum qildi, deb yozadi “Interfaks”.
“Biz bugun keyingi qadamlarni qabul qildik: biz alyansning sharqiy qismidagi harbiy ishtirokimizni kuchaytirishga qaror qildik. Polsha, shuningdek, Estoniya, Latviya va Litvaga to‘rtta batalyon rotatsiya asosida joylashtiriladi”, — dedi u NATO sammiti bo‘lib o‘tayotgan Varshavadagi matbuot anjumanida.
Uning so‘zlariga ko‘ra, bu 2017-yilda amalga oshiriladi. U, shuningdek, ushbu batalyonlar ko‘p millatli bo‘lishini ta’kidladi. “Ular Shimoliy Atlantika qudratini hamda alyansning har qanday a’zosiga qilingan hujum butun NATOga hujum deb hisoblanishini ko‘rsatib beradi”, — dedi Stoltenberg.
