OTMlarga hujjat topshirayotgan abituriyentlar uchun foydali ma’lumotlar

“Xushnudbek.uz” sayti Davlat test markazining saytida e’lon qilingan O‘zbekiston Respublikasi ta’lim muassasalariga qabul qilish bo‘yicha Davlat komissiyasining 2016-yil, 20-iyundagi 2-sonli bayoni va uning ilovalaridan o‘rin egallagan foydali ma’lumotlarni jamladi.

• Ta’lim yo‘nalishlari ro‘yxati va test bo‘yicha ularga muvofiq keluvchi fanlar majmuasi

Ko‘pchilik abituriyentlarni qiziqtiradigan asosiy savollardan biri, bu o‘zi tanlagan va hujjat topshirmoqchi bo‘lgan ta’lim yo‘nalishida qaysi fanlardan imtihon bo‘ladi hamda qaysi biriga necha ball berilishidir. Ular yuqoridagi asoslarga qarab tayyorgarlikka kuchlarini taqsimlaydi.

Shu haqda batafsil ma’lumot olish uchun ushbu havolaga o‘ting. Oliy harbiy ta’lim muassasalari uchun xuddi shu ma’lumot ushbu havolada mavjud.

• Test sinovlari bilan bir qatorda kasbiy (ijodiy) imtihonlar o‘tkaziladigan ta’lim yo‘nalishlari ro‘yxati

Ayrim ta’lim yo‘nalishlarida abituriyentlar nafaqat test imtihonidan o‘tadi, balki kasbiy (ijodiy) imtihon ham topshiradi. Kasbiy (ijodiy) imtihon topshirgan abituriyentlar 3 ta emas, 2 ta fandan imtihon topshiradi.

Shu haqda batafsil ma’lumot olish uchun ushbu havolaga o‘ting.

• Olimpiada fani va tanlovlar bilan oliy ta’lim yo‘nalishlari o‘rtasidagi kasbiy muvofiqlik

O‘zbekistonda fan olimpiadalari o‘tkaziladi va unda respublikada dastlabki 3 ta o‘rinni egallagan o‘quvchilar OTMlarga imtihonsiz davlat granti asosida qabul qilinadi. Xo‘sh, savol tug‘iladi, qaysi fandan g‘olib bo‘lgan o‘quvchilar qaysi OTMlarga imtihonsiz kira oladi? Masalan, matematika fanidan olimpiada g‘olibi bo‘lsa, qaysi OTMlarga kirishga huquqi bor?

Mazkur savollarga javob olish uchun ushbu havolaga o‘ting.

• Harbiy tavsiyanomaga ega abituriyentlar uchun ikkinchi OTM sifatida belgilanishi mumkin bo‘lgan oliy ta’lim muassasalari

Harbiy imtiyozga ega bo‘lgan abituriyentlar hujjat topshirayotganda arizalarida ikkita OTMni ko‘rsatishlari mumkin va asosiy OTMga balli yetmay qolgan taqdirda, ikkinchi OTMda o‘qish imkoniyatini (agar balli yetsa) qo‘lga kiritadi. Xo‘sh, ikkinchi OTM sifatida qayerlarni belgilash mumkin? Yoki istalgan OTMni tanlasa bo‘ladimi?

Albatta, yo‘q! Ikkinchi OTM sifatida tanlash mumkin bo‘lganlarning qat’iy ro‘yxati bor va o‘sha ro‘yxat mana bu havolada keltirilgan. Shuningdek, ushbu sahifada ta’lim yo‘nalishlari va ta’lim tili bo‘yicha qabul kvotalari ro‘yxati ham keltirilgan.

• Oliy ta’lim muassasalarining bir ta’lim sohasiga tegishli ta’lim yo‘nalishlari ro‘yxati va test bo‘yicha ularga muvofiq keluvchi fanlar majmuasi

Ba’zi abituriyentlar sohani tanlaydi-yu, lekin qaysi ta’lim yo‘nalishga hujjat topshirish haqida boshlari qotadi. Masalan, iqtisodchi bo‘lishni niyat qilgan, lekin ushbu sohaning yo‘nalishlari ko‘p-ku. Menejment bor, marketing bor, moliya, bank ishi, soliqlar va soliqqa tortish, buxgalteriya hisobi va h.k.

Bir ta’lim sohasiga tegishli ta’lim yo‘nalishlari ro‘yxati va ularga qaysi fanlardan imtihon bo‘lishi hamda necha balldan berilishi haqida ma’lumot ushbu havolada mavjud.

• Ko‘p balli tizim bo‘yicha kasbiy imtihonlar hamda test sinovlari asosida amalga oshiriladigan va o‘qitish tojik, qozoq, turkman va qirg‘iz tillarida olib boriladigan ta’lim yo‘nalishlari ro‘yxati

O‘zbekistonda ta’lim nafaqat o‘zbek, qoraqalpoq va rus tillarida, balki tojik, qozoq, turkman va qirg‘iz tillarida ham olib boriladi. Mazkur tillarda o‘qitish olib boriladigan ta’lim yo‘nalishlarida faqat chet tili fanidan test bo‘ladi. Qolgan asosiy fanlardan esa ko‘p balli tizim bo‘yicha kasbiy imtihonlar, boshqacha aytganda og‘zaki imtihon bo‘ladi.

Shu haqda batafsil ma’lumot olish uchun ushbu havolaga o‘ting.