Amerika Kubogi–2016 turnirining final bahsida Argentina va Chili terma jamoalari o‘zaro bahs olib bordi. Uchrashuvning asosiy va qo‘shimcha bo‘limlarida hisob ochilmadi. Penaltilar seriyasida esa Chili 4:2 hisobida g‘alaba qozonib, ketma-ket ikkinchi marta Amerika Kubogi sohibi bo‘ldi.
Argentina safida Lionel Messi penaltini noaniq amalga oshirgan bo‘lsa, Lukas Bigliyaning zarbasini Klaudio Bravo qaytarishga muvaffaq bo‘ldi. Chili tarkibida Arturo Vidal penaltini golga aylantira olmadi.
Qayd etish kerakki, Lionel Messi so‘nggi uchta finalda muvaffaqiyatsizlikka uchramoqda. 2014-yilgi jahon chempionati finalida Argentina termasi Germaniyaga (0:1) mag‘lub bo‘lgandi. 2015-yilgi Amerika Kubogi finalida ham Argentina penaltilar seriyasida (1:4) taslim bo‘lgandi.
Messi 2008-yili Argentina olimpiya terma jamoasi safida Pekin Olimpiadasi g‘olibi bo‘lgan, 2005-yilda esa yoshlar o‘rtasidagi jahon chempioni bo‘lgan. Ammo Lionel Messi Argentina milliy terma jamoasi bilan yirik turnirlarda biror marta ham bosh sovringa ega bo‘lmagan.
Qayd etish joiz, bu yilgi turnirda Argentina va Chili guruh bosqichida bir-biriga to‘qnash kelgan va o‘shanda Argentina 2:1 hisobida zafar quchgandi. Ammo finalda Xerardo Martino shogirdlariga omad kulib boqmadi.
Musobaqa yakuniga ko‘ra Argentina terma jamoasi Fair Play mukofoti bilan taqdirlandi. Chili posboni Klaudio Bravo turnirning eng yaxshi darvozaboni deb topilgan bo‘lsa, uning jamoadoshi Eduardo Vargas 6 ta gol bilan eng yaxshi to‘purar bo‘ldi. Chili yetakchisi Aleksis Sanches esa turnirning “Oltin to‘p” sovrinini qo‘lga kiritdi.
Amerika Kubogi—2016 ramziy terma jamoasi ham tuzildi. Unda 8 nafar Chili va 3 nafar Argentina futbolchisi joy oldi. Quyida ramziy terma jamoa bilan tanishing.
Izoh (0)