Америка Кубоги–2016 турнирининг финал баҳсида Аргентина ва Чили терма жамоалари ўзаро баҳс олиб борди. Учрашувнинг асосий ва қўшимча бўлимларида ҳисоб очилмади. Пенальтилар сериясида эса Чили 4:2 ҳисобида ғалаба қозониб, кетма-кет иккинчи марта Америка Кубоги соҳиби бўлди.
Аргентина сафида Лионель Месси пенальтини ноаниқ амалга оширган бўлса, Лукас Биглиянинг зарбасини Клаудио Браво қайтаришга муваффақ бўлди. Чили таркибида Артуро Видаль пенальтини голга айлантира олмади.
Қайд этиш керакки, Лионель Месси сўнгги учта финалда муваффақиятсизликка учрамоқда. 2014 йилги жаҳон чемпионати финалида Аргентина термаси Германияга (0:1) мағлуб бўлганди. 2015 йилги Америка Кубоги финалида ҳам Аргентина пенальтилар сериясида (1:4) таслим бўлганди.
Месси 2008 йили Аргентина олимпия терма жамоаси сафида Пекин Олимпиадаси ғолиби бўлган, 2005 йилда эса ёшлар ўртасидаги жаҳон чемпиони бўлган. Аммо Лионель Месси Аргентина миллий терма жамоаси билан йирик турнирларда бирор марта ҳам бош совринга эга бўлмаган.
Қайд этиш жоиз, бу йилги турнирда Аргентина ва Чили гуруҳ босқичида бир-бирига тўқнаш келган ва ўшанда Аргентина 2:1 ҳисобида зафар қучганди. Аммо финалда Херардо Мартино шогирдларига омад кулиб боқмади.
Мусобақа якунига кўра Аргентина терма жамоаси Fair Play мукофоти билан тақдирланди. Чили посбони Клаудио Браво турнирнинг энг яхши дарвозабони деб топилган бўлса, унинг жамоадоши Эдуардо Варгас 6 та гол билан энг яхши тўпурар бўлди. Чили етакчиси Алексис Санчес эса турнирнинг «Олтин тўп» совринини қўлга киритди.
Америка Кубоги—2016 рамзий терма жамоаси ҳам тузилди. Унда 8 нафар Чили ва 3 нафар Аргентина футболчиси жой олди. Қуйида рамзий терма жамоа билан танишинг.
Изоҳ (0)