Brexit бўйича овоз бериш натижалари дунё молия бозорларида саросима келтириб чиқарди. Фонд бошқарувчилари ва банкирлар зарарларга тайёрланмоқда, инвесторларга эса АҚШ ғазна қоғозлари ва олтинга пул тикишни тавсия қилмоқда, деб ёзади «РБК».
Буюк Британиянинг Евроиттифоқдан чиқиши тарафдорлари овозларнинг 51,8 фоизини тўплаган Brexit бўйича овоз бериш натижалари иенадан ташқари барча жаҳон бозорлари ва валюталари пасайиб кетишига сабаб бўлди.
Британия фунти 1,33 долларгача арзонлашиб, 1985 йилдан буён энг паст кўрсаткични намоён этди. Brent нефтининг бир баррели 6 фоизга тушиб кетди.
Япония иенаси эса савдолар чоғида деярли уч йиллик максимумгача кўтарилди ва 1 доллар учун 100 иенадан ошди. Евро курси, аксинча, март ойидан буён энг паст кўрсаткични намоён қилиб, 1,1 долларгача тушди.
Барча Осиё майдонларида индекслар сезиларли даражада пасайиб кетди. Япониянинг Nikkei 225 биржаси 8 фоиз йўқотди, Гонконг фонд биржаси Hang Seng 4,2 фоизга пасайди. Инвестиция фондлари бошқарувчилари вазиятни саросиманинг бошланиши дея тавсифлади, унинг оқибатларини эса ҳеч ким ҳозирча баҳолай олмайди.
«Бу жуда қўрқинчли, мен бунга ўхшаш ҳолатни ҳеч қачон кўрмаганман. Биз деярли барча активлардан маблағ оқиб кетишини кутмоқдамиз. Кўплаб инвесторлар кўп-кўп пул йўқотади», — деди ETF Securities тадқиқотлар ва инвестициялар бўлими раҳбари Жеймс Баттерфилл.
Mizuho Bank бош иқтисодчиси Вишну Варатан фикрича, ягона бехато стратегия — олтин ва Америка ғазна қоғозларини сотиб олиш.
Изоҳ (0)