Buyuk Britaniya bosh vaziri Devid Kemeron, qirollik aholisi referendumda mamlakatning Yevropa Ittifoqidan chiqishi uchun ovoz berganidan so‘ng, iste’fo berishini ma’lum qildi. Bu haqda u 24-iyun, juma kuni tongda ma’lum qildi, deya xabar bermoqda “Gazeta.uz”.
Kemeron vaziyatni barqarorlashtirish uchun kuzgacha o‘z lavozimida qolishga va’da berdi. “Mamlakatni keyingi manzilgacha olib boruvchi kapitan bo‘lib qolish to‘g‘ri bo‘ladi, deb o‘ylamayman”, — deya bosh vazirning so‘zlaridan iqtibos keltirmoqda The Guardian.
Kemeron jurnalistlar oldida qilgan hissiyotlarga boy chiqishida “Britaniya xalqining istagi bajo keltirilishi lozimligi”ni qayd etib o‘tdi. Uning qo‘shimcha qilishicha, olti yil davomida Britaniya hukumatiga rahbarlik qilish uchun uning uchun sharaf bo‘lgan.
23-iyun, payshanba kuni Birlashgan Qirollikda mamlakatning Yevropa Ittifoqiga a’zoligi masalasida referendum bo‘lib o‘tdi. Yevroittifoqdan chiqish uchun britaniyaliklarning qariyb 52 foizi ovoz berdi, aholining 48 foizi bunga qarshi chiqdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)