Surtsey oroli, Islandiya
Taqiq sababi: ilmiy tajribalar
1963-yilda Islandiyada mahalliy vulqon otilishi oqibatida 2,7 kvadrat kilometr maydondagi orol paydo bo‘ldi. Bu yangi hayot dunyoga kelishining tayyor namunasi bo‘lgani uchun turli mamlakat olimlari qiziqishini uyg‘otdi. Bu yerga faqat ilmiy maqsadda kelish mumkin.Keymada-Grandi oroli, Braziliya
Taqiq sababi: zaharli ilonlar
Braziliya sohilbo‘yidan 35 kilometr uzoqlikda joylashgan Keymada-Grandi oroli naq jannatning o‘zi. Biroq bu yerga tashrif sizga qimmatga tushishi mumkin: 0,43 kvadrat kilometr maydonda taxminan 4000 ilon, jumladan, chaqishi til tortmay o‘ldiradigan dunyodagi eng zaharli ilon — orol botropsi istiqomat qiladi.Shimoliy Sentinel oroli, Hindiston
Taqiq sababi: begonalarni yoqtirmaydigan tub aholi
Bengal bo‘g‘ozidagi Andaman orollaridan biri rasman Hindistonga qaraydi. Hududini faol himoya qiladigan va begonalarni yoqtirmaydigan (adashib qolgan baliqchilar ularning oxirgi qurboni bo‘ldi) tub aholi tufayli rasmiylar fuqarolarni sentinelliklar va ularning orolidan uzoqroq bo‘lishga chaqirdi.Ise ibodatxonasi, Yaponiya
Taqiq sababi: faqat ma’lum toifa uchun
Ise ibodatxonasi Yaponiyaning eng muhim ziyoratgohi hisoblanadi. Uning ichiga faqat oliy tabaqa ruhoniylari va imperatorlik oilasi a’zolari kirishi mumkin.Gruynard oroli, Shotlandiya
Taqiq sababi: biologik qurol sinovi
1942-yili Buyuk Britaniya hukumati Shotlandiyadagi mazkur orolni biologik qurol, jumladan, Sibir kuydirgisi sinovi uchun sotib oldi. Ekspertlar uning asoratlari orol tuprog‘ida saqlanib qolgani haqida ogohlantirdi, bu esa ushbu hudud yana yuz yillar davomida yashash uchun yaroqsiz bo‘lishini bildiradi.Lasko g‘orlari, Janubi-g‘arbiy Fransiya
Taqiq sababi: odamlar nafas chiqarganda hosil bo‘ladigan karbonat angidrid gazi ibtidoiy tasvirlarga shikast yetkazadi
Mazkur g‘orda eramizgacha XVIII—XV mingyilliklarga oid ilk tasviriy san’at namunalari mavjud. Oldin sayyohlar uchun ochiq bo‘lgan, biroq keyinchalik ular tomonidan chiqariladigan karbonat angidrid gazi tasvirlarga shikast yetkazishi aniqlangach yopib qo‘yilgan. Faqat kam sonli olimlar kirishi mumkin.51-hudud, Grum Leyk, AQSh
Taqiq sababi: yopiq harbiy baza
Ushbu harbiy baza 1950-yildan beri AQSh hukumatining maxfiy maqsadlari uchun xizmat qiladi. Rasmiy manbalarga ko‘ra, bu yerda tajriba uchish qurilmalari va qurollanish tizimlari ishlab chiqiladi. Ovozalarga ko‘ra, o‘nlab yillar avval qo‘ngan noma’lum uchuvchi jismlar saqlanadi.Shpitsbergendagi butunjahon urug‘ saqlash ombori, Norvegiya
Taqiq sababi: urug‘larning yopiq ombori
Omborda butun dunyodan keltirilgan har bir o‘simlikning urug‘lari saqlanadi. Ular tabiiy ofat yoki urush bo‘lgan taqdirda yangi o‘simliklar yetishtirish, aholini ozuqa bilan ta’minlash uchun foydalaniladi.Pine Gap harbiy bazasi, Avstraliya
Taqiq sababi: maxfiy harbiy baza
Avstraliyaning qoq markazida joylashgan Alis-Springs shahridan 18 kilometr janubi-g‘arbda joylashgan. Mamlakat iqtisodi uchun o‘ta muhim bo‘lgan baza AQSh va Avstraliya tomonidan boshqariladi.Mejgorye, Rossiya
Taqiq sababi: shahar yopiq ma’muriy-hududiy tuzilma maqomiga ega
Boshqirdistondagi mazkur shahar yopiq ma’muriy-hududiy tuzilma maqomiga ega. Respublika poytaxti Ufadan taxminan 200 kilometr uzoqda, Uralning eng baland tog‘i Yamantau yaqinida joylashgan. U yerda yerosti shahri — Rossiya Federatsiyasining zaxira poytaxti qurilayotgani haqida mish-mishlar yuradi.
Izoh (0)