Kanada parlamenti evtanaziya haqida qonun qabul qildi, deb yozadi “TASS”. 17-iyun, juma kuni uni mamlakat senati (milliy parlamentning yuqori palatasi) tasdiqladi.
Avvalroq qonun loyihasini quyi palata ma’qullagan edi. Endi qonun kuchga kirishi uchun uni Kanada general-gubernatori Devid Jonston imzolashi kerak, u Buyuk Britaniya qirolichasi Yelizaveta Ikkinchi — Kanada konstitutsiyaviy rahbarining rasmiy vakili hisoblanadi.
Qonun loyihasining qabul qilinishi oson bo‘lmadi. Uzoq davom etgan muzokaralardan so‘ng parlamentning har ikkala palatasi ham jiddiy kasallikka chalingan, ammo hali o‘lim to‘shagida bo‘lmagan kanadaliklar uchun evtanaziyaga ruxsat beradigan tuzatishlarni rad etdi.
Yangi qonun faqat Kanada fuqarolari uchun amal qiladi. Hujjatga ko‘ra, doktorlar yordamida o‘z ixtiyori bilan hayotdan ketishga bedavo dardga chalingan 18 yoshdan katta bo‘lgan ruhiy sog‘lom kishilar haqli. Qonunda, shuningdek, evtanaziyani o‘tkazgan shifokorlar jinoiy ta’qib qilinmasligi belgilangan.
Izoh (0)