Futbol bo‘yicha Yevropa chempionatlari tarixida shu vaqtgacha kuzatilmagan, umuman, boshqa istalgan sohada, tadbirda, holatda ham kuzatilishi qiyin bo‘lgan voqea qayd etildi. Musobaqa guruh bosqichi 1-turi doirasidagi Albaniya — Shveysariya uchrashuvida tug‘ishgan aka-ukalar — Taulant Jaka va Granit Jaka bir-biriga qarshi to‘p surdi.
Jakalar asli kosovolik albanlardan. Taulant Jaka 1991-yil 28-martda sobiq Yugoslaviyada — hozirgi Kosovoning poytaxti Prishtinada dunyoga kelgan. Uning ukasi — Granit Jaka esa oila Shveysariyaga ko‘chib o‘tganidan so‘ng — 1992-yil 27 sentabrda Bazelda tug‘ilgan.
Taulant ham, Granit ham professional futbolchilik faoliyatini Shveysariyada boshlagan, Shveysariyaning o‘smirlar, yoshlar va olimpiya darajasidagi barcha jamoalarida o‘ynagan. Tarixiy vatan — Albaniyadan taklif tushmagani uchun, uka — Granit Jaka 2011-yildan boshlab Shveysariya milliy terma jamoasi sharafini himoya qila boshlagan.
Biroq aka — Taulant vatandan taklifni kutishda davom etgan va 2013-yili Albaniya terma jamoasidan chaqiruv olgan. 2013-yil dekabrida Albaniya fuqaroligini qabul qilib, 2014-yil sentabrida Albaniya termasi safida debyut qilgan (avvalroq debyut qilishga jarohatlar yo‘l qo‘ymagan).
Ma’lumot uchun, Albaniya — Shveysariya uchrashuvida 1:0 hisobi qayd etildi, unda Taulant Jaka jamoadoshlari mag‘lubiyatga uchradi. Granit Jaka esa uchrashuvning eng yaxshi o‘yinchisi deb topildi.
Izoh (0)