Футбол бўйича Европа чемпионатлари тарихида шу вақтгача кузатилмаган, умуман, бошқа исталган соҳада, тадбирда, ҳолатда ҳам кузатилиши қийин бўлган воқеа қайд этилди. Мусобақа гуруҳ босқичи 1-тури доирасидаги Албания — Швейцария учрашувида туғишган ака-укалар — Таулант Жака ва Гранит Жака бир-бирига қарши тўп сурди.
Жакалар асли косоволик албанлардан. Таулант Жака 1991 йил 28 мартда собиқ Югославияда — ҳозирги Косовонинг пойтахти Приштинада дунёга келган. Унинг укаси — Гранит Жака эса оила Швейцарияга кўчиб ўтганидан сўнг — 1992 йил 27 сентябрда Базелда туғилган.
Таулант ҳам, Гранит ҳам профессионал футболчилик фаолиятини Швейцарияда бошлаган, Швейцариянинг ўсмирлар, ёшлар ва олимпия даражасидаги барча жамоаларида ўйнаган. Тарихий ватан — Албаниядан таклиф тушмагани учун, ука — Гранит Жака 2011 йилдан бошлаб Швейцария миллий терма жамоаси шарафини ҳимоя қила бошлаган.
Бироқ ака — Таулант ватандан таклифни кутишда давом этган ва 2013 йили Албания терма жамоасидан чақирув олган. 2013 йил декабрида Албания фуқаролигини қабул қилиб, 2014 йил сентябрида Албания термаси сафида дебют қилган (аввалроқ дебют қилишга жароҳатлар йўл қўймаган).
Маълумот учун, Албания — Швейцария учрашувида 1:0 ҳисоби қайд этилди, унда Таулант Жака жамоадошлари мағлубиятга учради. Гранит Жака эса учрашувнинг энг яхши ўйинчиси деб топилди.
Изоҳ (0)