Afsonaviy bokschi Muhammad Alining ona shahri Luisvillda 10-iyun, juma kuni bo‘lib o‘tgan dafn marosimiga minglab odamlar to‘plandi. Ularning orasida boshqa shtatlar va chet eldan kelgan muxlislar ham bor edi. Quyida havola etiladigan fotogalereya orqali buyuk inson va sportchini so‘nggi yo‘lga kuzatish lahzalari haqida tasavvurga ega bo‘lishingiz mumkin.
Tobut Alining uyi, Afroamerika merosi markazi va afsonaviy sportchi nomi bilan atalgan xiyobon yonidan olib o‘tildi. Stadionda bo‘lib o‘tgan dafn marosimiga bepul chiptalar yarim soatda tarqalib ketdi.
Marosimda ko‘plab taniqli insonlar — Arnold Shvarsenegger, Uill Smit, Lennoks Lyuis, Mayk Tayson ishtirok etdi, sobiq prezident Bill Klinton so‘zga chiqdi. Barak Obama videomurojaat yo‘lladi — AQSh prezidenti katta qizining bitiruv kechasi sababli marosimga kelolmadi.
Uning tobutini yerga qo‘yish tor doirada o‘tdi — qabristonga Alining muxlislari qo‘yilmadi. Tobut tepasida Alining oilasi — turmush o‘rtog‘i Iolanta, qizlari Maryam va Rashida turdi.
Foto: Reuters.
Bir kun oldin Luisvillda Muhammad Ali bilan islom rusumlariga muvofiq xayrlashuv marosimi bo‘lib o‘tgandi.
Eslatib o‘tamiz, afsonaviy bokschi Muhammad Ali 3-iyun kuni 74 yoshida vafot etgandi.
Izoh (0)