Rossiyalik mehmon: menga avval barcha “-iston”lar bir xil bo‘lib tuyular edi

Rossiyalik Facebook foydalanuvchisi Buxoro shahriga tashrif buyurib, olgan taassurotlari bilan o‘rtoqlashdi.

U, avvalo, buxoroliklarning bag‘rikengligidan hayratga tushganini qayd etdi. Ular “boshqacha” fikrlaydigan, “boshqacha” kiyinadigan va “boshqacha” tilda gaplashadiganlarga nazokat bilan munosabatda bo‘linishini ta’kidladi.

O‘zi guvoh bo‘lgan do‘stona munosabatga alohida to‘xtalib o‘tdi. “Ko‘chaning oxirigacha yetguningizcha, besh—olti marta to‘xtab, hol-ahvol so‘rashishadi. Bir-birining bergan savolini va javobini jon qulog‘i bilan eshitadi”, — deyiladi postda.

Rossiyalik mehmon, shuningdek, qo‘shnilar bir-biriga doim yordam ko‘rsatishini, bir-birining bolalarini, ularning qaysi kunda tug‘ilgani-yu, qanday kasal bo‘lgani — barchasini yaxshi bilishini aytib, hayratini yashirmadi.

“Menga avval barcha ‘-iston’lar bir xil bo‘lib tuyulardi. Nima farqi bor? Qozog‘iston, Qirg‘iziston, O‘zbekiston, Tojikiston. Jazirama, mevalar — bo‘ldi. Aslida esa ular turli-tuman va ajoyib ekan”, — deya xulosa bildirdi rossiyalik mehmon.