Bortida portlovchi uskuna borligi ehtimoli sabab Urganch aeroportiga favqulodda qo‘ngan Misrning EgyptAir aviakompaniyasiga tegishli A-330-220 layneri Pekinga uchib ketdi. Bu haqda, Misr rasmiylariga asoslanib, Associated Press agentligi xabar bermoqda.
Ma’lum bo‘lishicha, noma’lum shaxs Qohira aeroporti xavfsizlik xizmatiga qo‘ng‘iroq qilib, Qohiradan Pekinga uchayotgan samolyot bortida portlovchi uskuna borligini aytgan. Shundan so‘ng Misr tomoni zudlik bilan samolyot bilan bog‘lanib, eng yaqin aeroportga qo‘nish haqida ko‘rsatma bergan.
Ismi oshkor etilmagan Misr rasmiylarining Associated Press’ga ma’lum qilishicha, samolyot izchil tekshiruvdan o‘tkazilgan va uning bortidan portlovchi uskuna topilmagan. Qo‘nganidan to‘rt soat o‘tib, layner Urganchdan Xitoy poytaxtiga uchib ketgan.
Avvalroq O‘zbekiston aviatsiya rasmiylari bortida portlovchi uskuna mavjudligi ehtimoli munosabati bilan EgyptAir samolyotidan favqulodda qo‘nish haqida iltimos olgani, samolyot Urganchga qo‘ndirilgani va uning bortidagi 135 kishi evakuatsiya qilingani haqida xabar berilgan edi.
Izoh (0)