2016-yildagi eng qimmatbaho o‘nta avtomobil brendining umumiy qiymati Millward Brown nashri tomonidan 139,9 milliard dollarga baholandi — bu o‘tgan yilgidan 3 foizga kamroqdir. Reytingning oldingi yetakchilari egallagan o‘rinlarini yanada mustahkamlab oldi, deb xabar beradi “Vedomosti”.
Ta’kidlanishicha, brendlarning narxiga nafaqat omadli xarid kampaniyalari, balki yoshlar orasidagi moda va qiziqishlar ham ta’sir o‘tkazmoqda.
Bu safar ham eng qimmatbaho avtomobil brendi deb Toyota tan olindi. Uning narxi 2 foizga o‘sib, 29,5 milliard dollarga yetdi. Jahon brendlarining birinchi yuzligida Toyota 28-o‘rinni egallab kelmoqda.
BMW 7-seriya sedanlarining yangi avlodini chiqarish bilan obro‘yini yanada oshira oldi. Yangi mashina texnologiyalarga boyligi bilan katta shuhrat qozondi. Brendning narxi 2 foizga oshib, 26,84 milliard dollarni tashkil etdi. Top-100 da BMW 33-pog‘onada ketmoqda.
Mercedes-Benz brendida esa boshqalarga nisbatan ikki barobarga — 4 foizga o‘sish kuzatildi. Uning narxi 22,71 milliard dollarni tashkil qildi. Bir qancha muvaffaqiyatli modellarni chiqarishdan tashqari, brend Xitoydagi xaridlarning o‘sishi hisobiga ko‘rsatkichlarining yaxshilanishiga erishdi. Top-100 da Mercedes-Benz 39-o‘rinda.
Honda brendida esa 1 foizlik tushish kuzatildi, narx 13,2 milliard dollarni tashkil etdi. Yaponiya kompaniyasi, asosiy raqobatchisi — Toyota singari, mashinalar dizayniga ko‘proq e’tibor qarata boshladi. Brendning Top-100 dagi o‘rni — 74.
Ford’da o‘zgarish sodir bo‘lmadi — o‘tgan yilgidek, brend narxi 13,08 milliard dollarga teng bo‘ldi. Jahonning eng kuchli brendlari yuzligida esa Ford besh pog‘onaga ko‘tarilib, 75-natijani qayd qildi. Kompaniya biznes-modelni o‘zgartirib, avtomobillar ishlab chiqarish va sotishdan ko‘ra yangi mobillik xizmatlariga kattaroq urg‘u bera boshladi — u FordPass servisini, FordHub do‘konini hamda yosh mijozlar talablariga javob beradigan boshqa dasturlarni ishga tushirdi.
Nissan brendining narxi bir yil ichida 1 foizga o‘sib, 11,48 milliard dollarga yetdi. Kompaniya yaxshi rivojlanmoqda, ayniqsa Shimoliy Amerika bozorida bu yaqqol sezilmoqda. Top-100 da u 92-marrani egallab turibdi.
Audi “ona” korporatsiya bo‘lmish Volkswagen bilan birgalikda “dizelgeyt” tufayli jiddiy zarar ko‘rdi — brend narxi 6 foizga tushib, 9,5 milliard dollarni tashkil etdi. O‘tgan yili VW avtomobillar o‘nligida 9,28 milliard dollar narx bilan 8-pog‘onada turgandi. Bu safar u o‘nlikka kira olmadi. Ikki brend kuchli yuzlikka ham kirmaydi.
Yevropaning eng yirik avtomobilsoziga tegishli boshqa marka — Porsche esa o‘nlikdan Lexus’ni siqib chiqara oldi. Sport avtomobillari ishlab chiqaruvchi kompaniya brendi 4,44 milliard dollarga baholandi.
Land Rover brendi Xitoy bozoridagi xaridlarning tushishidan ziyon ko‘rdi. Uning narxi 5 foizga tushdi va 4,73 milliardga tenglashdi.
Tesla elektromobillar brendi birinchi marta kuchli o‘ntalikka 4,44 milliard dollar baho bilan kira oldi. Brend avtomobilsozlik kelajagi sifatida ko‘rilmoqda, yangi modelning chiqarilishi esa ko‘plab odamlarni o‘sha kelajakka yanada yaqinlashtiradi. Shuningdek, kompaniya to‘g‘ridan-to‘g‘ri xaridlar modelini yoymoqda — bu usul kelajakda mashinalarni dilerlik tarmoqlari orqali tarqatishning o‘rnini bosishi mumkin.
Izoh (0)