2016 йилдаги энг қимматбаҳо ўнта автомобиль брендининг умумий қиймати Millward Brown нашри томонидан 139,9 миллиард долларга баҳоланди — бу ўтган йилгидан 3 фоизга камроқдир. Рейтингнинг олдинги етакчилари эгаллаган ўринларини янада мустаҳкамлаб олди, деб хабар беради «Ведомости».
Таъкидланишича, брендларнинг нархига нафақат омадли харид кампаниялари, балки ёшлар орасидаги мода ва қизиқишлар ҳам таъсир ўтказмоқда.
Бу сафар ҳам энг қимматбаҳо автомобиль бренди деб Toyota тан олинди. Унинг нархи 2 фоизга ўсиб, 29,5 миллиард долларга етди. Жаҳон брендларининг биринчи юзлигида Toyota 28-ўринни эгаллаб келмоқда.
BMW 7-серия седанларининг янги авлодини чиқариш билан обрўйини янада ошира олди. Янги машина технологияларга бойлиги билан катта шуҳрат қозонди. Бренднинг нархи 2 фоизга ошиб, 26,84 миллиард долларни ташкил этди. Топ-100 да BMW 33-поғонада кетмоқда.
Mercedes-Benz брендида эса бошқаларга нисбатан икки баробарга — 4 фоизга ўсиш кузатилди. Унинг нархи 22,71 миллиард долларни ташкил қилди. Бир қанча муваффақиятли моделларни чиқаришдан ташқари, бренд Хитойдаги харидларнинг ўсиши ҳисобига кўрсаткичларининг яхшиланишига эришди. Топ-100 да Mercedes-Benz 39-ўринда.
Honda брендида эса 1 фоизлик тушиш кузатилди, нарх 13,2 миллиард долларни ташкил этди. Япония компанияси, асосий рақобатчиси — Toyota сингари, машиналар дизайнига кўпроқ эътибор қарата бошлади. Бренднинг Топ-100 даги ўрни — 74.
Ford’да ўзгариш содир бўлмади — ўтган йилгидек, бренд нархи 13,08 миллиард долларга тенг бўлди. Жаҳоннинг энг кучли брендлари юзлигида эса Ford беш поғонага кўтарилиб, 75-натижани қайд қилди. Компания бизнес-моделни ўзгартириб, автомобиллар ишлаб чиқариш ва сотишдан кўра янги мобиллик хизматларига каттароқ урғу бера бошлади — у FordPass сервисини, FordHub дўконини ҳамда ёш мижозлар талабларига жавоб берадиган бошқа дастурларни ишга туширди.
Nissan брендининг нархи бир йил ичида 1 фоизга ўсиб, 11,48 миллиард долларга етди. Компания яхши ривожланмоқда, айниқса Шимолий Америка бозорида бу яққол сезилмоқда. Топ-100 да у 92-маррани эгаллаб турибди.
Audi «она» корпорация бўлмиш Volkswagen билан биргаликда «дизельгейт» туфайли жиддий зарар кўрди — бренд нархи 6 фоизга тушиб, 9,5 миллиард долларни ташкил этди. Ўтган йили VW автомобиллар ўнлигида 9,28 миллиард доллар нарх билан 8-поғонада турганди. Бу сафар у ўнликка кира олмади. Икки бренд кучли юзликка ҳам кирмайди.
Европанинг энг йирик автомобилсозига тегишли бошқа марка — Porsche эса ўнликдан Lexus’ни сиқиб чиқара олди. Спорт автомобиллари ишлаб чиқарувчи компания бренди 4,44 миллиард долларга баҳоланди.
Land Rover бренди Хитой бозоридаги харидларнинг тушишидан зиён кўрди. Унинг нархи 5 фоизга тушди ва 4,73 миллиардга тенглашди.
Tesla электромобиллар бренди биринчи марта кучли ўнталикка 4,44 миллиард доллар баҳо билан кира олди. Бренд автомобилсозлик келажаги сифатида кўрилмоқда, янги моделнинг чиқарилиши эса кўплаб одамларни ўша келажакка янада яқинлаштиради. Шунингдек, компания тўғридан-тўғри харидлар моделини ёймоқда — бу усул келажакда машиналарни дилерлик тармоқлари орқали тарқатишнинг ўрнини босиши мумкин.
Изоҳ (0)