Mashhurlik xatolarni kechirmaydi, ijtimoiy tarmoqlar esa xatoni darhol sud jarayonisiz hukmga aylantiradi. Shov-shuvli xatti-harakatlari tufayli nomlari hozirda taqiqlangan mashhur insonlar haqida ma’lumot beramiz.
Kevin Speysi: maishiy zo‘ravonlik bo‘yicha ayblovlar
2017-yilda Kevin Speysi eng hurmatli aktyorlardan biri edi — ikki marta “Oskar” mukofoti sohibi, “Qog‘oz uy” serialidagi ajoyib manipulyator Frenk Andervud. Biroq aktyor Entoni Rep 1986-yildagi ziyofatda Speysini shilqimlikda ayblashi bilan hammasi o‘zgardi. Shundan so‘ng Speysiga qarshi yana 15 kishi, jumladan, rejissyor Toni Montana, aktyor Roberto Kavazos, Richard Dreyfusning o‘g‘li Garri va “Qog‘oz uy” serialidagi to‘qqiz hamkasbi ayblov bildirdi.
Speysining o‘zini oqlashga urinishi jamoatchilik noroziligini yanada kuchaytirdi. Bir hafta ichida Netflix va Sony u bilan barcha aloqalarni uzdi va “Dunyodagi barcha pullar” filmidan uning sahnalari olib tashlandi — obro‘-e’tibori barbod bo‘ldi.
Speysi barcha ayblovlarni inkor etdi, hech qanday dalil topilmadi. 2022-yil oktyabr oyida Nyu York sudi uni oqladi, ammo bu ham unga avvalgi mavqeyini qaytara olmadi. Yirik loyihalar va rollar o‘tmishda qoldi, Gollivud sanoati esa uni qayta qabul qilmadi.
Kanye Uest: yahudiylarga qarshi bayonotlar
Kanye Uest shunchaki reper emas, balki davr ramzi edi: Adidas bilan hamkorlikdagi kolleksiyalar, Balenciaga reklamasi, jahon modasiga ta’siri. Biroq bu narsalar antisemitik janjallardan so‘ng barham topdi.
Hammasi Kanyening Parij moda haftaligida “White Lives Matter” (“Oqlarning hayoti muhim”) shiori tushirilgan futbolkada paydo bo‘lishi bilan boshlandi — bu ibora afroamerikaliklarga nisbatan masxara sifatida qabul qilindi. Puff Daddy tomonidan tanqid qilinganidan so‘ng, Uest bir qator tajovuzkor tvitlarni e’lon qildi. Ulardan biri: “Men hozir uyqusirayapman, lekin uyg‘onganimda, YAHUDIY XALQIGA qarshi DEFCON 3 o‘taman” degan tvit darhol norozilik to‘lqinini qo‘zg‘atdi.
Bir necha kun ichida Kanye o‘zining asosiy shartnomalarini yo‘qotdi: Adidas, Balenciaga, Gap, Universal va boshqa ko‘plab brendlar u bilan hamkorlikni to‘xtatdi. Uning hisoblari yetakchi musiqa platformalari va ijtimoiy tarmoqlarda to‘sib qo‘yildi, u Forbes milliarderlari ro‘yxatidan chiqarib tashlandi.
Ammo 2023-yilda Uest “Men Gitlerni yaxshi ko‘raman” kabi e’tiroflar va ochiq antisemitik matnli qo‘shiqlar bilan ommaviy axborot vositalarini yana hayratga soldi. Natijada u nafaqat boyligidan, balki avlod yetakchisi maqomidan ham mahrum bo‘ldi.
Armi Hammer: zo‘ravonlik va kannibalizm bo‘yicha ayblovlar
Yaqingacha Armi Xammer Gollivud hashamatining timsoli edi, “Meni isming bilan chaqir” filmida yangi yulduz sifatida tan olindi. Biroq 2021-yil boshida hammasi o‘zgarib ketdi: noma’lum shaxs Xammer o‘zini odamxo‘r deb atagan va zo‘ravonlik haqida xayol surgan dahshatli yozishmalarni oshkor qildi. Buning ortidan boshqa ayollar uni nojo‘ya va tajovuzkor xatti-harakatda ayblashdi.
Aktyorning karyerasi bir hafta ichida barbod bo‘ldi: u barcha loyihalardan chetlashtirildi, yetakchi agentlar u bilan hamkorlik qilishdan voz kechdi.
Janjal ortidan Armi Kayman orollariga jo‘nab ketdi, u yerda sayohat yo‘riqchisi bo‘lib ishladi va turli qaramliklardan xalos bo‘lish uchun reabilitatsiyadan o‘tdi. 2024-yil kuzida Xammer jamoatchilik e’tiboriga qaytdi, ijtimoiy tarmoqlarda yangi akkaunt ochdi va kichik rollar ijro eta boshladi, biroq endi unga kinoindustriyadagi avvalgi mavqeyini qaytarib olish imkonsiz bo‘lib qoldi.
Xarvi Vaynshteyn: “Gollivud qiroli”ning qulashi
Xarvi Vaynshteyn Gollivudning eng nufuzli prodyuserlaridan biri, Miramax va The Weinstein Company asoschisi edi. Biroq uning karyerasi shov-shuvli mojaro tufayli barbod bo‘ldi. 2017-yilda The New York Times gazetasi tergovni e’lon qildi, unda Vaynshteyn o‘nlab yillar davomida aktrisalar va xodimlarga nisbatan jinsiy tazyiq o‘tkazganlikda ayblandi. Shundan so‘ng Anjelina Joli va Gvinet Peltrou kabi 100 dan ortiq ayol bu ayblovlarni qo‘llab-quvvatladi.
Prodyuser o‘z kompaniyasidan chetlashtirildi, Nyu York va Los-Anjeles sudlari uni zo‘rlash va tazyiq o‘tkazganligi uchun 23 va 16 yillik qamoq jazosiga hukm qildi. 2024-yil aprelida Nyu Yorkdagi birinchi hukm bekor qilindi, ammo 2025-yil yozida Vaynshteyn teleboshlovchi Miriam Xeyli, aktrisa Jessika Mann va model Kayya Sokolning yangi ko‘rsatmalari asosida yana aybdor deb topildi. Vaynshteyn ayollar bilan barcha uchrashuvlar o‘zaro kelishuv asosida bo‘lganini ta’kidlab, o‘zini bir necha bor oqlashga urinishiga qaramay, hamon qamoqxonada.
Bugungi kunda o‘ylamasdan aytilgan bir og‘iz so‘z, hurmatsizlik yoki shov-shuvli xatti-harakat bor-yo‘g‘ini yo‘qotish uchun yetarli. Ijtimoiy tarmoqlar har qanday suddan ham tezroq munosabat bildirmoqda, jamiyat esa mashhurlarning shoshqaloqligi va takabburligini kechirmaydi. Bu voqealar shunchaki xatolar ro‘yxati emas, balki ogohlantirish: hatto eng yorqin yulduz ostida ham qora soya bo‘lishi mumkin.
Izoh (0)