Avstriya prezidentligiga o‘nglardan nomzod Norbert Xofer saylov uchastkalarida berilgan ovozlar hisoblab chiqilgach, saylovchilarning 51,9 foiz ovozlarini qo‘lga kiritgani ma’lum bo‘ldi, deb yozadi “Kommersant” respublika ichki ishlar vazirligi ma’lumotlariga tayanib.
Uning raqibi, “yashillar” sobiq yetakchisi Aleksandr Van der Bellen saylovchilarning 48,1 foiz ovozlariga ega bo‘ldi. Ta’kidlanishicha, ushbu raqamlar ichiga avstriyaliklar tomonidan pochta orqali berilgan ovozlar kiritilmagan. Ular tez orada hisoblab chiqiladi va, ehtimol, yakuniy natijaga ta’sir o‘tkazadi.
Bu hafta Avstriya taqdirini keskin o‘zgartirib yuborishi mumkin: 17-may, seshanba kuni yangi kansler, sotsial-demokratik partiya yetakchisi Kristian Kern qasamyod qildi, endi esa yangi prezident saylanmoqda. Undan ilgarigi kansler — Verner Fayman, prezidentlik saylovlarining ikkinchi turiga ikki yetakchi siyosiy kuch vakillari emas, balki muxolifat ko‘rsatgan nomzodlar chiqishi ma’lum bo‘lgach, iste’fo bergan edi.
Izoh (0)