Toshkentdagi Bratislava ko‘chasining Tafakkur ko‘chasiga burilish qismidan Pedagogika universiteti asosiy binosi oldidagi aylanma harakatlanishgacha bo‘lgan qismiga kirish taqiqlandi. Facebook’dagi “Voditeli Tashkenta” va “Voditeli Tashkenta (Drivers.uz)” guruhlarida qoldirilgan xabarlarga ko‘ra, “Konstitutsiya” mahallasiga burilish joyidan o‘tgandan so‘ng “Kirish taqiqlangan” yo‘l belgisi o‘rnatilgan.
“Gul bozordan Pedagogika universitetiga borish yo‘liga ‘g‘isht’ (“Kirish taqiqlangan” yo‘l belgisining ommaviy nomi — “Daryo”) osib qo‘yishibdi”, — deb yozadi foydalanuvchilardan biri. “Aylanma harakatlanish joyida yo‘l nazoratchilari turibdi, belgidan o‘tib kelganlarning barini bitta qo‘ymay tutishyapti”, — deb xabar qoldirgan boshqa bir foydalanuvchi.
Bratislava ko‘chasining qayd etilgan qismiga “Kirish taqiqlangan” yo‘l belgisi aynan qachon o‘rnatilgani haqida aniq ma’lumot yo‘q. Ko‘chaning bu qismiga kirish nima uchun taqiqlangani noma’lum.
Izoh (0)