Toshkentning Uchtepa tumanidagi Yusuf Sakkokiy ko‘chasi yangidan asfaltlandi. Bu haqda Facebook’dagi “Voditeli Tashkenta” guruhida 19-may, payshanba kuni fotoxabar qoldirilgan.
“Uchtepa tumani Yusuf Sakkokiy ko‘chasidagi xayrli ish davom ettirildi”, — deb yozgan fotoxabar muallifi. 20-may kuni esa fotoxabar muallifi tekis yo‘lda to‘p tepib yurgan mahalla bolalari suratini e’lon qilgan.
Foydalanuvchilarning aksariyati Sakkokiy ko‘chasining ta’mirlangani haqidagi xabarni olqishlagan, bu yo‘l ko‘pdan ta’mirga muhtoj bo‘lganini qayd etib o‘tgan. Sakkokiy ko‘chasining avtobus saroyi oldidagi, 17-tramvay yo‘li bilan parallel qismi ayniqsa ta’mirtalab edi.
Ayni vaqtda, bir guruh foydalanuvchilar endi bu yerda mahalla poygachilari paydo bo‘lishidan xavotir bildirgan. Shuningdek, ba’zilar tez orada bu yerga ekskavatorlar kelib, yo‘l ostidagi quvurlarni ta’mirlashga kirishishi mumkinligini istehzo bilan qayd etgan.
Izoh (0)