Afg‘onistondagi barqarorlik NATO mamlakatlarining o‘z xavfsizligini ta’minlaydi, shu tufayli, bu mamlakat alyans uchun juda muhimdir, deya ma’lum qildi tashkilot bosh kotibi Yens Stoltenberg. Bu haqda “Interfaks” xabar bermoqda.
“Bizning ishimiz Afg‘oniston uchun ahamiyatli, shuningdek, o‘z xavfsizligimiz uchun ham muhim”, — dedi Stoltenberg 18-may, chorshanba kuni NATO mamlakatlari tashqi ishlar vazirlarining uchrashuvi munosabati bilan Bryusselda tashkil qilingan matbuot anjumanida.
“Afg‘oniston NATO uchun muhim ekanligining yana bir sababi shundaki, bu alyansning eng yirik harbiy operatsiyasidir, biz uni ko‘p yillardan buyon olib bormoqdamiz. U bizga juda qimmatga tushdi, ko‘plab kishilar hayoti yo‘qotildi, va bu NATOning Afg‘onistonda xavfsizlik va barqarorlikni ta’minlash bo‘yicha juda jiddiy, ulkan investitsiyalaridir”, — deya qo‘shib qo‘ydi u.
Stoltenbergning aytishicha, tashqi ishlar vazirlari Bryusseldagi uchrashuvda “Qat’iy ko‘mak” missiyasining kelajagini ko‘rib chiqadi. U g‘oya yirik harbiy operatsiyalar o‘tkazishda emas, mahalliy kuchlar mamlakat mudofaasi va xavfsizligini ta’minlay olishi uchun ularni tayyorlashda ekanligini ta’kidladi.
Izoh (0)