Афғонистондаги барқарорлик НАТО мамлакатларининг ўз хавфсизлигини таъминлайди, шу туфайли, бу мамлакат альянс учун жуда муҳимдир, дея маълум қилди ташкилот бош котиби Йенс Столтенберг. Бу ҳақда «Интерфакс» хабар бермоқда.
«Бизнинг ишимиз Афғонистон учун аҳамиятли, шунингдек, ўз хавфсизлигимиз учун ҳам муҳим», — деди Столтенберг 18 май, чоршанба куни НАТО мамлакатлари ташқи ишлар вазирларининг учрашуви муносабати билан Брюсселда ташкил қилинган матбуот анжуманида.
«Афғонистон НАТО учун муҳим эканлигининг яна бир сабаби шундаки, бу альянснинг энг йирик ҳарбий операциясидир, биз уни кўп йиллардан буён олиб бормоқдамиз. У бизга жуда қимматга тушди, кўплаб кишилар ҳаёти йўқотилди, ва бу НАТОнинг Афғонистонда хавфсизлик ва барқарорликни таъминлаш бўйича жуда жиддий, улкан инвестицияларидир», — дея қўшиб қўйди у.
Столтенбергнинг айтишича, ташқи ишлар вазирлари Брюсселдаги учрашувда «Қатъий кўмак» миссиясининг келажагини кўриб чиқади. У ғоя йирик ҳарбий операциялар ўтказишда эмас, маҳаллий кучлар мамлакат мудофааси ва хавфсизлигини таъминлай олиши учун уларни тайёрлашда эканлигини таъкидлади.
Изоҳ (0)