Google’ning Android qurilmalar uchun mo‘ljallangan maxsus mobil dasturi — Google Keyboard (o‘zbekchasiga — Google Klaviatura)da o‘zbek tili uchun ham Gesture Typing — qo‘l uzmasdan yozish imkoniyati qo‘shildi. Bu imkoniyat mobil dasturning so‘nggi — 16-maydagi yangilanishidan so‘ng paydo bo‘ldi.
Qo‘l uzmasdan yozish funksiyasining qulayligi shundaki, biror so‘zni yozish uchun har bir harfning ustiga bosib chiqish shart emas — so‘zning birinchi harfi ustiga bosib turib, barmoqni, qo‘l uzmasdan turib, boshqa harflar ustida yurgizib chiqish kifoya — Google Klaviatura kerakli so‘zni aksariyat hollarda to‘g‘ri chiqarib bera oladi.
Google Klaviatura o‘zbek tilini ko‘pdan beri qo‘llab-quvvatlaydi — biror so‘zni yozayotganda mobil dastur avval kiritilgan so‘zlar, boshqa foydalanuvchilar tomonidan kiritilgan so‘zlar yoki o‘zidagi baza orqali so‘zning to‘liq shaklini, turlanishlarini taklif qiladi.
Ba’zan shunday ham bo‘ladiki, nafaqat bir so‘zni, balki butun bir gapni ham Google’ning o‘zi (suggestion’lar vositasida) “yozib beradi”.
Google Klaviatura o‘zbek tilini faqat lotin yozuviga asoslangan o‘zbek alifbosi bo‘yicha qo‘llab-quvvatlaydi, klaviaturada lotin yozuviga asoslangan o‘zbek alifbosidagi o‘ va g‘ harflari, tutuq belgisi alohida tugmalarda ko‘rsatilgan.
Izoh (0)