Moskvadagi tez yordam brigadalari o‘ta mustahkam planshetlar bilan jihozlanadi

Rossiya poytaxtidagi 1,2 mingta tez yordam brigadasi va shoshilinch yordam bo‘linmasi kuzda 1,4 mingta planshet bilan jihozlanadi. Ular tibbiyot xodimlari qo‘lqopni yechmay gadjetlardan foydalanishiga imkon beruvchi stiluslarga ham ega bo‘ladi. Bu haqda “TASS” xabar bermoqda.

Yangi qurilmalar Moskva yagona tibbiy axborot-tahlil tizimiga integratsiyalashadi, bu esa tez yordam xodimlari bemorlarning elektron kartalariga kirishiga yordam beradi. Shifokorlar yo‘ldayoq bemorning allergiyaga moyilligi, surunkali va boshqa kasalliklari haqidagi ma’lumotga ega bo‘ladi.

Qurilmalar o‘ta mustahkam va favqulodda sharoitlarga bardoshli bo‘lishi ko‘zda tutilgan. Zarbaga qarshi gadjetlar 10 soat quvvatlanishsiz ishlashga imkon beruvchi sig‘imi kuchli batareyalar, Wi-Fi va 3G modullari bilan jihozlanadi.

Ma’lumot uchun, Moskvadagi tez yordam brigadalarida 10 mingdan ziyod xodim mehnat qiladi, ular kuniga 12 minggacha tashrifni amalga oshiradi.