Google kartinalarni o‘ta katta hajmli surat sifatida raqamlashtiradigan kamerani taqdim etdi

Google kompaniyasi kartinalarni raqamli shaklga aylantirib, ularni bir gigapikselli surat sifatida saqlash qobiliyatiga ega maxsus Art Camera fotokamerasini taqdim etdi, deya xabar bermoqda TJournal.

Avvallari bitta tasviriy san’at asarini raqamlashtirishga sutkalab vaqt ketgan bo‘lsa, endi bir metrga bir metrlik kartinani skanerlash vaqti yarim soatgacha qisqardi.

Art Camera’dan foydalanishda kartinani devordan olish kerak bo‘lmaydi. Obyektiv to‘g‘ri surat qarshisiga o‘rnatiladi, operator kameraga ishlov beriladigan hududni ko‘rsatadi va uning burchaklarini belgilab qo‘yadi, kamera esa kartinani juda kuchli tarzda kattalashtirgan holda suratga olishni boshlaydi. So‘ng olingan kadrlar Google serverlariga yuboriladi, u yerda dastur bir necha soat davomida ularni bir butun qilib biriktiradi.

Google ixtiyorida bunday kameralardan jami 20 ta bo‘lib, ular foydalanish uchun bepul beriladi, bu kolleksiyalarni raqamlashtirish sur’atlarini ham oshiradi, chunki loyihada ishtirok etish istagida bo‘lganlar ko‘payib bormoqda.