Toshkentdagi Rohat aylanasidan Parkent bozoriga olib boruvchi Ohangaron yo‘lida 16-may, dushanba kuni katta tirbandlik kuzatildi. Bu haqda Facebook’dagi “Voditeli Tashkenta” va “Voditeli Tashkenta (Drivers.uz)” guruhlarida foto- va videoxabarlar qoldirilgan.
UZ24’ning yozishicha, tirbandlik Ohangaron yo‘lining Tuzel qo‘rg‘onidan o‘tuvchi qismida kuzatilgan. Nashr xabariga ko‘ra, tirbandlikka yomg‘ir va undan keyin yuzaga kelgan katta ko‘lmaklar sabab bo‘lgan.
Ijtimoiy tarmoq foydalanuvchilarining ba’zilari tirbandlikka svetofor ishlamayotganini sabab qilib ko‘rsatgan, ayni vaqtda, boshqa bir guruh foydalanuvchilar svetofor ishlayotgani, yo‘l nazoratchilari vaziyatni tartibga solishga urinayotganini yozgan.
Avvalroq Toshkentda yog‘ingarchilik sabab shaharning bir qator ko‘chalari suvga to‘lgani haqida xabar berilgan edi.
Izoh (0)