15-may, yakshanba kuni O‘zbekistonning qariyb barcha hududlarida yog‘ingarchilik kuzatildi. “O‘zgidromet” markazining 15-may soat tonggi 8:00 dan 16-may soat 8:00 gacha bo‘lgan meteorologik ma’lumotlarni jamlagan byulletenida faqat Surxondaryo viloyatidagi meteostansiyalar yog‘ingarchilikni qayd etmagani ko‘rsatilgan.
Ma’lumotlarga ko‘ra, 15-may kuni eng ko‘p — 34 millimetr miqdoridagi yog‘in Toshkent viloyatining Chimyon hududiga tushgan. Jizzax viloyatining Do‘stlik tumanida va Toshkent viloyatining Angren shahrida joylashgan meteostansiyalari hududga 20 millimetrdan yog‘in tushganini qayd etgan.
Shuningdek, shu kuni Toshkent shahriga 19 millimetr, Sirdaryo viloyatining Sirdaryo shahriga 16 millimetr, Qamchiq dovoniga 11 millimetr, Andijon viloyatining Qo‘rg‘ontepa tumaniga 10 millimetr yog‘in tushgan.
Avvalroq 15-may kuni Qoraqalpog‘iston Respublikasi, Xorazm, Buxoro va Navoiy viloyatlaridan boshqa hududlarda, xususan, tog‘li joylarda yog‘ingarchilik kutilishi, momaqaldiroq bo‘lishi mumkinligi haqida axborot berilgan edi.
Qayd etish joiz, Toshkent shahrida 16-may kuni kuzatilgan yog‘ingarchilik oqibatida shaharning qator ko‘chalari suv ostida qolgan; aynan shu sabab bilan ba’zi ko‘chalarda tirbandliklar yuzaga kelgani haqida xabarlar paydo bo‘ldi.
Izoh (0)