15 май, якшанба куни Ўзбекистоннинг қарийб барча ҳудудларида ёғингарчилик кузатилди. «Ўзгидромет» марказининг 15 май соат тонгги 8:00 дан 16 май соат 8:00 гача бўлган метеорологик маълумотларни жамлаган бюллетенида фақат Сурхондарё вилоятидаги метеостанциялар ёғингарчиликни қайд этмагани кўрсатилган.
Маълумотларга кўра, 15 май куни энг кўп — 34 миллиметр миқдоридаги ёғин Тошкент вилоятининг Чимён ҳудудига тушган. Жиззах вилоятининг Дўстлик туманида ва Тошкент вилоятининг Ангрен шаҳрида жойлашган метеостанциялари ҳудудга 20 миллиметрдан ёғин тушганини қайд этган.
Шунингдек, шу куни Тошкент шаҳрига 19 миллиметр, Сирдарё вилоятининг Сирдарё шаҳрига 16 миллиметр, Қамчиқ довонига 11 миллиметр, Андижон вилоятининг Қўрғонтепа туманига 10 миллиметр ёғин тушган.
Аввалроқ 15 май куни Қорақалпоғистон Республикаси, Хоразм, Бухоро ва Навоий вилоятларидан бошқа ҳудудларда, хусусан, тоғли жойларда ёғингарчилик кутилиши, момақалдироқ бўлиши мумкинлиги ҳақида ахборот берилган эди.
Қайд этиш жоиз, Тошкент шаҳрида 16 май куни кузатилган ёғингарчилик оқибатида шаҳарнинг қатор кўчалари сув остида қолган; айнан шу сабаб билан баъзи кўчаларда тирбандликлар юзага келгани ҳақида хабарлар пайдо бўлди.
Изоҳ (0)