O‘zbekiston Vazirlar Mahkamasi 6-maydagi qarori (pdf) bilan Qoraqalpog‘istonning Mo‘ynoq tumanida baliqchilik tarmog‘ini yanada rivojlantirish chora-tadbirlarini tasdiqladi, deya xabar bermoqda “Gazeta.uz”.
Hujjatda Mo‘ynoq tumani hokimligi huzurida ustav kapitali 200 million so‘mga teng “Mo‘ynoq akva sanoat” davlat unitar korxonasini tashkil etish hamda shu tumanda joylashgan “Jaltirbas”, “Sudochye” va “Ribachye” tabiiy suv havzalarini ushbu DUKga doimiy alohida foydalanish uchun berish ko‘zda tutilgan.
“Ipoteka-bank” kreditlari hisobiga joriy yilda “Mo‘ynoq akva sanoat” suv havzalari hududida baliq pitomniklari va inkubatsiya sexlari tashkil etiladi.
Shuningdek, “Mo‘ynoq akva sanoat” DUKga suv havzalarida qafas usulida baliq yetishtirish texnologiyalarini yaratish va joriy etish, suv havzalari hududida havaskorlik va sport maqsadidagi baliq ovini, turizmni rivojlantirish, baliq ovlash hajmini ko‘paytirish, raqobatbardosh baliq mahsulotlari va yarim tayyor mahsulotlarni ishlab chiqarish bo‘yicha texnologik jarayonlarni bosqichma-bosqich shakllantirish vazifalari yuklatildi.
Izoh (0)