«Запорожец» автомобилларини ишлаб чиқарувчиси ҳисобланган Украинадаги «ZAZ» автозаводи апрель ойи охиридан қайта ишга тушиб, янги модель — ZAZ Vida Pick-up’ни конвейерга қўйишини маълум қилди. Бу ҳақда «Autonews.ru» хабар бермоқда.
«ZAZ» 2012 йилдан бери Т250 платформасидаги Chevrolet Aveo автомобилини ZAZ Vida номи ишлаб чиқаради. Компания 2013 йили Vida седанининг фейслифт қилинган вариантини намойиш этган, бироқ янгиланган модель сериялаб ишлаб чиқаришга қўйилмаган эди.
Қайд этиш жоиз, 2016 йилдан Ўзбекистонда йиғилиши кутилаётган Т250 платформасидаги Ravon Nexia’нинг олд кўриниши «ZAZ» 2012 йилдан бери ишлаб чиқараётган ZAZ Vida хетчбеки билан бир хил.
Хабар беришларича, энди «ZAZ» олд томони Ravon Nexia билан қарийб бир хил бўлган, бироқ орқа томони ZAZ Lanos пикапига ўхшаш моделни апрель ойи охиридан сериялаб ишлаб чиқара бошлайди ва бу модель айнан ZAZ Lanos пикапига ўринбосар бўлади.
Эътиборли томони, Ўзбекистонда ҳозирнинг ўзида умумий кўриниши Ravon Nexia’га ўхшаш (фақат олд чеҳраси бошқачароқ) ZAZ Vida седанини ҳам, олд томони Ravon Nexia’ники билан қарийб бир хил ZAZ Vida хетчбекини ҳам сотиб олиш мумкин.
Эслатиб ўтамиз, Ravon Nexia 2016 йилнинг иккинчи чорагидан сериялаб ишлаб чиқарилиши ҳақида аввалроқ хабар берилган эди. Россияда бозорида 2016 йил июлидан пайдо бўлиши кутилаётган автомобиль Андижон ва Тошкент кўчаларида синовдан ўтказилаётгани маълум қилинган эди.
Изоҳ (0)