Jahon bankining so‘nggi hisobotida O‘zbekiston “Biznesni ro‘yxatga olish” ko‘rsatkichi bo‘yicha o‘tgan yilgi natijadan 22 pog‘onaga ko‘tarilib, 42-o‘rinni egalladi, deya xabar bermoqda “Gazeta.uz”. Agar 2014-yil yakunlariga ko‘ra, biznesni ro‘yxatdan o‘tkazish uchun yettita jarayondan o‘tish kerak bo‘lgan bo‘lsa, 2015-yil yakunlari bo‘yicha ushbu raqam beshtagacha kamaydi. Ro‘yxatdan o‘tkazish muddati esa 7,5 kundan o‘rtacha 6,5 kungacha qisqardi.
BMT Taraqqiyot dasturining “O‘zbekiston biznes-forumi (III bosqich)” loyihasi ekspertlari bunday keskin o‘zgarishni bir nechta omillar bilan bog‘lamoqda. Birinchidan, bu Prezidentning 2014-yil 7-apreldagi buyrug‘iga ko‘ra keng ko‘lamli islohotlar o‘tkazilishi, jumladan, tadbirkorlik subyektlarini davlat ro‘yxatidan o‘tkazishni internet orqali amalga oshirish mexanizmining kiritilishidir.
Ikkinchidan, biznesni Interaktiv davlat xizmatlari yagona portali (my.gov.uz) orqali ro‘yxatga olish O‘zbekistonda biznes ochish jarayonini ancha soddalashtirdi.
Islohotlarni o‘tkazish shu bilan yakunlanib qolmadi. O‘zbekiston savdo-sanoat palatasi “O‘zbekiston biznes-forumi (III bosqich)” loyihasi ko‘magida biznesni ro‘yxatdan o‘tkazish tizimini tubdan isloh etish bo‘yicha takliflarni ishlab chiqishda davom etmoqda.
Taklif qilinayotgan tizim korxonani onlayn rejimida 30 daqiqa ichida ro‘yxatga olish imkonini beradi. Shu bilan birga, u arizachini ro‘yxatga oluvchi organ, ro‘yxatga olish uchun davlat bojini to‘lash kerak bo‘lgan bank kassasiga borish zaruratidan ozod etadi.
Qo‘shma loyiha ekspertlarining dastlabki hisob-kitoblariga ko‘ra, Jahon banki uslubiga muvofiq, O‘zbekiston biznesni ro‘yxatdan o‘tkazish jarayoni ikki bosqichdan iborat bo‘lishi mumkin, bular real vaqt rejimida ro‘yxatdan o‘tkazish hamda bank hisobini ochish.
Izoh (0)