Жаҳон банкининг сўнгги ҳисоботида Ўзбекистон «Бизнесни рўйхатга олиш» кўрсаткичи бўйича ўтган йилги натижадан 22 поғонага кўтарилиб, 42-ўринни эгаллади, дея хабар бермоқда «Газета.uz». Агар 2014 йил якунларига кўра, бизнесни рўйхатдан ўтказиш учун еттита жараёндан ўтиш керак бўлган бўлса, 2015 йил якунлари бўйича ушбу рақам бештагача камайди. Рўйхатдан ўтказиш муддати эса 7,5 кундан ўртача 6,5 кунгача қисқарди.
БМТ Тараққиёт дастурининг «Ўзбекистон бизнес-форуми (III босқич)» лойиҳаси экспертлари бундай кескин ўзгаришни бир нечта омиллар билан боғламоқда. Биринчидан, бу Президентнинг 2014 йил 7 апрелдаги буйруғига кўра кенг кўламли ислоҳотлар ўтказилиши, жумладан, тадбиркорлик субъектларини давлат рўйхатидан ўтказишни интернет орқали амалга ошириш механизмининг киритилишидир.
Иккинчидан, бизнесни Интерактив давлат хизматлари ягона портали (my.gov.uz) орқали рўйхатга олиш Ўзбекистонда бизнес очиш жараёнини анча соддалаштирди.
Ислоҳотларни ўтказиш шу билан якунланиб қолмади. Ўзбекистон савдо-саноат палатаси «Ўзбекистон бизнес-форуми (III босқич)» лойиҳаси кўмагида бизнесни рўйхатдан ўтказиш тизимини тубдан ислоҳ этиш бўйича таклифларни ишлаб чиқишда давом этмоқда.
Таклиф қилинаётган тизим корхонани онлайн режимида 30 дақиқа ичида рўйхатга олиш имконини беради. Шу билан бирга, у аризачини рўйхатга олувчи орган, рўйхатга олиш учун давлат божини тўлаш керак бўлган банк кассасига бориш заруратидан озод этади.
Қўшма лойиҳа экспертларининг дастлабки ҳисоб-китобларига кўра, Жаҳон банки услубига мувофиқ, Ўзбекистон бизнесни рўйхатдан ўтказиш жараёни икки босқичдан иборат бўлиши мумкин, булар реал вақт режимида рўйхатдан ўтказиш ҳамда банк ҳисобини очиш.
Изоҳ (0)