Ramzan Qodirov o‘ziga mer lavozimi uchun taklif qilingan bir jomadon dollar haqida gapirib berdi

Checheniston rahbari Ramzan Qodirovga merlardan birining lavozimi uchun bir jomadon dollar ko‘rinishidagi porani taklif qilishgan. Bu haqda uning o‘zi “RIA Novosti”ga bergan intervyusida aytib o‘tdi, deb yozadi “RBK”.

Uning aytishicha, hodisa respublikani hali uning otasi Ahmad Qodirov boshqarayotgan paytlarda sodir bo‘lgan. “Avvalroq, Ahmad Hoji rahbar bo‘lgan vaqtlarda, odamlar kelib, bir kishi shahar meri bo‘lishni istayotganini aytgandi. So‘ng u mashina yukxonasini ochib, menga u yerdagi jomadonni ko‘rsatdi. Men umrimda birinchi marta shuncha dollarni ko‘rishim edi. Men unga insonlarga xos tarzda, bizda hech narsa sotilmasligi va sotib olinmasligini, bu yerga adashib kelganini tushuntirdim”, — deya gapirib berdi Qodirov.

Hozir Chechenistonda kimlardir pora taklif qilishi-qilmasligi haqidagi savolga respublika rahbari salbiy javob berdi.